Sr. Carlyle de Coteau di e team di maneho di Departamento Maritimo di Aruba (Directie Scheepvaart) ta informa cu niun compania acuatico na Aruba actualmente tin un permiso valido, ya cu tur a caduca.
El a laga sa cu pa e ultimo 6 aña minister di Transporte no a otorga niun permiso nobo pa beach. Si nan a otorga permiso acuatico pa companianan dedica na sambuyamento, piscamento, chapter, pero nan sitio di operacion no ta ariba beach sino fei di cierto piernan.
Permiso pa Deporte Acuatico
Na 2009 gobierno di Aruba pa medio di minister di Transporte a bay over pa duna pa duna permiso pa compania acuatico of asina yama “Watersport vergunning”. El splica cu esaki tabata hinca den ley caba pero tabatin hopi compania cu ta operando riba beach cu ta operando ariba un palabracion pa nan por a cuminsa opera tanten nan lo haya un permiso acuatico.
Pero a inicia despues cu e proceso pa pone tur e palabracionnan aki bou un permiso, y e permiso acuatico aki ta valido pa 5 aña. “Nos a yega na dado momento cu tur a caduca. Y dos aña pasa minister Oduber a dicidi pa wanta tur renobacion di permiso acuatico pasobra gobierno tabata trahando riba e Beach Policy”, segun sr. De Coteau a declara na Bon Dia Aruba.
El a bisa cu intencion di introduccion di e Beach Policy entrante 1 di juli ta esun literalmente di organisa tur actividad riba beach pasobra el a “bay fei di man”.
Maneho
Pa tal motibo minister Otmar Oduber di Transporte y su colega sr. Benny Sevinger di Infrastructura a bin cu un maneho nobo pa otorgamento di servicio acuatico. Ta asina cu e maneho nobo ta stipula cu no ta bay duna un permiso general mas. Antes e operador di compania acuatico tabata solicita pa un permiso general sin specifica ki sorto di actividad nan ta bay realisa cu e Permiso pa Deporte Acuatico.
El a splica cu antes e compania tabata haya e permiso aki y nan tabata hinca den dje varios actividad acuatico manera Sea doo, piscamento, Banana boat, etc… Esaki a trece cun’e cu riba beach bo ta haya un aglomeracion di cantidad di actividad pa diferente compania acuatico. “Esey no ta bay ta e caso mas cu e Beach Policy”, asina sr. De Coteau a declara.
Pa trece ordo riba e tipo di actividad aki esun cu ta bay solicita pa un permiso acuatico mester specifica kico sorto di operacion of actividad riba lama bo kier haci cu e permiso ey y na unda.
Unabes cu e peticion ta drenta nan ta manda esey pa Departamento di Infrastructura y Planificacion (DIP), ya cu e departamento aki mester check si e sitio unda e solicitante a pidi tin mas compania operando, y si un mas lo por bini si of no. Teniendo na cuenta cu e Beach Policy lo bay determina si un compania lo por opera den un sitio determina, ya cu eventualmente ta mucho aglomera caba cu actividad acuatico.
.jpg "Blue Blocks Project” Iniciativa di hobennan pa conscientisa comunidad pa cuida nos beachnan y naturalesa")
