E beach di Daimari ta keda sufri pisa di e trafico di jeep y otro vehiculonan motorisa cu ta uza e beach pa crusa di e area for di Andicuri pa Moro (Aruba chikito) y sigui bay Conchi.
No ta prome biaha cu Bon Dia Aruba ta raporta riba e problema aki. Locual hopi persona, mas tanto local no sa, ta cu e beach ta forma parti di Parke Nacional Arikok y ta proteha. Banda di esaki ley ta prohibi pa vehiculonan motorisa core riba santo blanco.
Sinembargo diadomingo cu a pasa, hopi hende tabata core na e costa Noord tambe pa wak e impacto di horcan Matthew sea pa disfruta di un off road. E caminda biniendo for di Andicuri ta yega net dilanti beach unda tin un tranc. Sinembargo hopi biaha ta traha pasashi den e muraya, kitando e piedranan.
E diadomingo awor lama a trece hopi awa aden formando un rooi hundo unda mayoria biaha e vehiculonan ta pasa pa sigui nan trip pa Moro/Conchi. Esaki a haci cu jeep a opta pa core full riba e beach y asina causa peliger pa nechi di turtuga y parha. Ora e reportero di Bon Dia Aruba a acerca un jeep, a ripara cu ta trata di Rubiano. Nan a indica cu nan no sa cu ta prohibi pa core riba santo blanco.
Un poco despues tres auto ta pasando, esun cu plachi number local ta guia dos jeep. Ora e reportero ta purba para nan, un di e turistanan ta grita for di jeep: “Yes, thank you police officer.” Y e ta sigui core tras di e pickup local. Nan ta crusa Daimari y sigui core direccion Moro, asina drenta e parke via caminda ilegal.
Promocion versus proteccion
Aruba Tourism Authority ta promoviendo luganan bou turistanan awor cu no ta mucho conoci y te awor no ta conoci mucho presion turistico. Luganan unda Rubianonan mes ta bay pa disfruta y den tur e tempo a keda basta proteha contra e efectonan di turismo masal. Den e caso cu turismo no ta bon regla, esaki por causa hopi daño na naturalesa, habitat di bestia.
Bon Dia Aruba a puntra minister encarga cu Turismo, si lo bay regla esaki tambe awor cu ta promoviendo e luganan ‘scondi’ y lo atrae mas turista. “Si, mester wak con nos ta bay haci esey. Pero nos mester tene cuenta tambe cu pa mas y mas turista awendia beach y lama no ta suficiente mas. Nan ta buscando otro experiencianan.”
