Desde e ciere di dump na Parkietenbos, comunidad ainda ta buscando informacion pa loke ta trata desperdicio di sushi, unda mester benta esaki afo. Tambe por a nota den diferente medio di comunicacion cu dumpnan ilegal a cuminsa aparece mas y mas. Vocero di Bureau City Inspector (BCI), Robby Rosel, a aclaria durante conferencia di prensa e procesonan cu tin na luga aworaki pa benta sushi afo.

Rosel a splica cu durante aña 2022 BCI y departamentonan concerni a sinta na mesa pa yega na un acuerdo den cual BCI ta bay ta haciendo trabaonan di mantencion di limpiesa di Aruba conhuntamente cu tur otro departamentonan cu ta cay bao Ministerio di Medio Ambiente.

Pa loke ta trata e sushedad rond di Aruba, Rosel a indica, BCI lo ta encarga cu esaki. El a agrega cu BCI a haya seis ploeg caba cu a drenta den servicio dia 3 di januari di e aña aki y nan ta bay yuda recoge e sushedad rond di Aruba.

Pa loke ta trata e otro trabaonan, el a sigui splica cu Cuerpo Policial ta bay ta encarga cu tur locual ta e cabritonan y tambe e criadero di bestia, entre otro cabrito, carne etc y tambe cacho. Pa loke ta trata criadero di sangura, esaki ta cay bao di GKMB y DVG.

DNM ta encarga cu deramenan di azeta, beerputten di cas ta cay bao di BCI y DVG, y pa e negoshinan esaki lo cay solamente bao di DNM.

DNM ta encarga tambe cu locual ta garagenan ilegal, parti electricidad di WEB, tuberianan di awa cu ta kibra y refineria entre otro.

Loke ta encera asfalt ta cay bao di DOW, gas cu liek na cas ta cay bao di DVG y tambe Bureau City Inspector.

Rosel a recorda tambe cu BCI ta encarga cu e plataforma FIXI. Plataforma FIXI ta e sistema nobo cu a wordo introduci pa e Ministerio di Medio Ambiente cu ta disponibel pa cualkier persona na Aruba cu kier trece nan reclamo pa dilanti di tur locual cu ta encera sushedad y BCI lo comparti e trabao na cada departamento. Apart di e plataforma FIXI tambe por yama BCI na 5829777 pa informa di nan reclamo.

Pa loke ta trata e cierre di dump na Parkietenbos, Rosel a indica cu despues cu e ciere di dump a tuma luga dia 31 di december 2022 BCI automaticamente e momento ey, conhuntamente cu e ploegnan cu nan tin, Serlimar y demas departamentonan mester tuma over nan trabaonan.

El a remarca cu comunidad mester tene na cuenta cu Serlimar no a cera, Serlimar ta habri y ta sigui duna servicio.

Rosel a splica tambe cu e simpel motibo cu dump a cera ta pa e motibo di e 37 miyon florin cu Aruba tin cu paga y cu cada persona tin cu contribui cu esaki. “Esey no tabata facil pa yega na e ciere di dump pero mester a hacie y naturalmente tur sushedad lo wordo deposita na EcoTech.”

Pa loke ta procesamento di sushi, Rosel a indica cu e sushi den e barinan di sushi di EcoTech y Serlimar, tur cos ta wordo procesa hunto como sushi di cas. Si ta encera sushedad di compania chikito cu ta busca sushedad, e ora si mester separa cada sushi cu lo tira afo na EcoTech.

“Ya caba esaki ta andando, e ta bayendo poco poco pero den un bon caminda,” el a agrega.

Rosel a menciona tambe cu BCI a habri e aña nobo y ariba dia 3 di januari nan a ricibi e prome melding cual tabata trata di sushedad tira den mondi na Sabana Liber.

“Nos tin cu bisa hopi sushi rond di Aruba. Esaki no ta prome aña, no solamente pa motibo cu dump a cera, pero esaki ta un tradicion di tur aña cu BCI ta encontra cu gran cantidad di sushi rond di Aruba ora cu temporada cuminsa,” Rosel a enfatisa.

El a haci yamada na comunidad pa sigui mantene Aruba limpi y a pesar di e cambio radical, el a accentua cu comunidad mester custuma cu no por haci uso di dump mas. EcoTech ta encarga pa locual ta e sushedad y loke ta electrodomesticonan, manera frigidaire, no por hiba esakinan caminda cu ta cumpra metal.

“Comunidad tin cu siña biba cu e realidad, cu e cambio, pasobra tin cambionan pa miho y tin cambionan pa pio, pero nos ta haci un cambio pa miho y nos ta spera cu e mensahe por yega na comunidad di Aruba pa mantene nos isla limpi.”

Rosel a splica cu di aña pasa caba e departamentonan a sinta hunto y e siman aki tambe nan a sinta hunto tambe pa palabra ki trabao cada departamento ta bay ta encarga cune. Nan a yega un acuerdo y segun Rosel ta subraya, cada departamento mester haci su trabao pa nan por yega caminda nan mester yega pa loke ta e parti di limpiesa di Aruba.

Un punto importante cu Rosel a señala ta cu pronto lo introduci e sistema di camara di Aruba. Lo pone camara na e sitionan na unda semper e desperdicionan ta wordo tira.

El a enfatisa cu mester tene cuenta tambe cu ora temporada di awasero yega y Santa Rosa tin cu haci tur e damnan limpi, e ta doloroso ora nan saca e tera pa por deposita esaki un caminda cu e por bira gordura pa futuro y nan ta haya stove, bestia morto y hasta mueblenan tira eyden. “Tur desperdicio tira den e dam y nos ta bisa cu esaki no por. Nos ta pidi comunidad pa ban coopera.”

Por ultimo Rosel a splica cu meldingnan di dumpnan ilegal den aña 2022 a subi cu alrededor di 4% compara cu aña 2021. Pa loke ta e inicio di aña, 22 di december pa 3 di januari, esaki a keda mescos pues no a subi ni baha.