Desde cu dump na Parkietenbos a cera dia 1 di januari 2023, e problema di sushi y dumpnan ilegal na Aruba a bira cada biaha pio. Ariba rednan social ciudadanonan ta reporta un cantidad alarmante di dumpnan ilegal rond di Aruba, como tambe diferente situacion na unda hendenan ta usa bakinan di sushi di otro pa benta nan sushi afo.

Na ex Papiamento restaurant, patras di Schoolstraat den centro di Oranjestad, na e monumento conoci como Cas Veneranda, tabatin un dump ilegal cu apart di ta un mahos bista, tabata yena e area cu mal holor. Algun dia atras ariba nan pagina di Facebook Bureau City Inspector a informa cu nan tabata presenta na e sitio pa haci limpiesa y elimina e dump ilegal aki.

Den e ultimo temponan centro di Oranjestad ta wordo afecta bastante pa e tiramento di sushi ilegal. Adictonan ambulante den e area, cual ta otro problema cu mester atencion urgente, ta usa e edificionan bandona pa biba, pa tira nan sushi, entre otro.

Lamentabel ta cu centro di ciudad ta un area cu tin hopi trafico di turista y na mas di un ocasion turistanan a yega di expresa nan disgusto pa tanto e situacion cu e adictonan ambulante como tambe e sushi cu tin rond y e mal holor cu esaki ta causa.

Bureau City Inspector (BCI) ta e organisacion encarga cu mantencion di limpiesa y den caso aki cu e eliminacion di dumpnan ilegal. Den luna di october 2022 Gobierno di Aruba a lansa e plataforma FIXI, cual ta e plataforma ariba cual ciudadanonan por meld dumpnan ilegal cu tin rond Aruba. BCI ta ricibi e notificacionnan aki a traves di e plataforma pa asina por tuma e accionnan necesario.

Pero no ta solamente Bureau City Inspector esun cu por atende melding di un usuario, tambe departamentonan como Santa Rosa, Directie Natuur en Milieu (DNM) Fundacion Parke Nacional Aruba of Serlimar tambe por atende cualkier melding cu por drenta riba e plataforma.

Den otro esfuerso pa conscientisa comunidad pa hiba un maneho di desperdicio responsabel y sostenibel, a traves di e campaña nacional di Gobierno di Aruba, Limpi Limpi, Minister di Transporte, Integridad, Naturalesa y Asuntonan di Adulto Mayor, Ursell Arends, a lansa e iniciativa di ‘Baki den Bario’. Un iniciativa cu pueblo a aplaudi na unda nan por hiba nan desperdicio y deshaci di esaki responsablemente.

Pero a pesar di e diferente esfuersonan aki, te ainda ciudadanonan ta sigui reporta dumpnan ilegal na varios caminda. Manera ta e trend aworaki, ciudadanonan ta usa e diferente rednan social pa trece pa dilanti un cantidad di situacionnan pa expresa nan malcontento, nan preocupacion of pa haci denuncia publico.

Na mas di un ocasion por a mira ariba rednan social publicacionnan di usuarionan cu ta indica cu tin dump ilegal of problema cu sushi den cierto area.

Den ultimo dianan di januari mes tabatin dos situacion cu tabata concerni problema cu sushi. Un di nan tabata trata di un publicacion di un grupo di persona cu ta hike y explora Aruba y cu lamentablemente a topa cu un dump ilegal durante un di nan hike.

“Ta duel mi hopi mi ta post e cos ki na Papiamento, nos ta un grupo non traditional cu ta hike via luga nan cu no tin trails, dus nos ta bay cu machete kap mata y traha nos mesun ruta, gewoon cana deep den nos naturalesa di Aruba. Nos ta echt letterlijk explora Aruba unda hende normalmente no sa yega mes, y no sa mes cu ta existente. Awe nos a bin topa esaki, deep den mondi den Santa Cruz. Mi tin hopi potret saca pero ta haci hopi dolor pa saca nan,” e publicacion a indica referiendo na e dump ilegal cu nan a encontra den naturalesa.

E otro situacion tabata trata di un publicacion di e club YMCA Aruba na unda nan a trece pa dilanti un situacion cu nan ta enfrenta, frecuentemente, cu hendenan desconoci cu ta haci uso di nan barinan di sushi y e espacio rond di e barinan di sushi pa pone nan saconan di sushi eynan.

“Lastimamente personanan desconoci a trece nan sushi rond di e bari di sushi di YMCA Dakota. Esaki ta algo cu ta pasa demasiado frecuente. Pa cada bes nos haci esaki limpi nos fundacion mester paga cu tur reto financiero cu nos tin,” e publicacion ta indica.

Asina tin mas usuario cu ta expresa nan malconteto, nan opinion of simplemente ta trece pa dilanti e situacionnan cu nan ta pasando aden cu ta envolve problema cu tiramento di sushi ilegal.

E ta un hecho cu Aruba ta un pais demasiado chikito pa por sostene un poblacion di e tamaño actual, y teniendo na cuenta cu casi tur cos ta wordo importa, no por ignora mas e hecho cu si nunca nada no ta sali di e lugar aki, cu loke mas di 100 mil hende ta produci na desperdicio, e problema di sushi cu ta existi aworaki, ta bay bira un caos inmanehable. Ta e momento clave anto pa cuminsa pensa riba exportacion di desperdicio.

Potretnan ta for di pagina di Facebook di BCI.