Ayera riba nan pagina oficial di Facebook, Bureau City Inspector (BCI) a publica un video na unda por mira un ciudadano ta piki e sushi cu el a tira ilegalmente, hinca esaki back den su auto y na final a ricibi su boet for di BCI.

Manera e ciudadano aki tin hopi mas cu ta scoge pa benta nan sushi, nan desperdicio banda di caminda, den naturalesa of ta tira esaki den dumpnan ilegal rond di Aruba.

E problematica di sushi na Aruba ta keda un topico di combersacion. Ciudadanonan iresponsabel ta prefera di benta nan sushi unda cu ta en bes di deshaci di esaki di e manera corecto y contribui na mantene Aruba limpi.

Den e caso aki, BCI a logra haya e persona cu a benta un cantidad di sushi den un area publico. E persona aki mester a compaña e funcionarionan di BCI pa recoge tur su sushi back y hinca e saconan back den su auto. BCI a graba e video y a publica esaki riba nan pagina di Facebook pa asina demostra cu actonan iresponsabel tin consecuencia.

No solamente e persona aki mester a recoge tur su sushi back, pero el a ricibi un boet tambe for di funcionarionan di BCI door di a tira sushi ilegalmente.

Kedando den e mesun tema di problema di sushi, Dienst Openbare Werken (DOW) tambe a publica ayera algun potret ariba nan pagina di Facebook na unda por mira sushi benta den santo di lama na Baby Beach.

“Ta pidi nos localnan y sigur nos turistanan pa por fabor tene nos beachnan limpi. Esaki no ta e manera pa comporta na nos beachnan. Por fabor tene cuenta,” e publicacion tabata bisa.

E publicacion a capta hopi atencion y ciudadanonan a expresa nan malcontento pa e situacion cu tin andando.

“Hopi gusta trece mil y un cos lama. Pero ora di bay cas ta laga tur sushi atras. Jammer e mentalidad ey. Hopi biaha nos ta bay cu saco di plastic djis pa piki tur cups, tayo, forki, papel, cabo di sigaria, boter, pamper, straw etc. cu ta keda benta unda nos ta bay lama,” un usuario a comenta.

“Pone watchman riba beach pa vigila ken ta tira sushi y parti boet halto”; “A bira tempo pa hende biba mas netjes, berdad! Bon bisa DOW”; “Mester educa e hendenan cu ta bay lama pa hiba un saco di sushi, dump nan sushi aden y principal hiba e saco cas dump e den nan bari,” ta algun di e otro comentarionan riba e publicacion aki.