E reserva obligatorio di banconan comercial ta keda na 24 porciento. Esaki ta decision cu Comite di Maneho Monetario, CMM di Banco Central a dicidi na Juli ultimo. E tarea di CMM ta pa evalua, determina y provee transparencia riba e accionnan di maneho monetario di Banco Central di Aruba BCA.
Durante e reunion di 20 di juli 2022, CMM a dicidi pa mantene e reserva obligatorio na 24,0 porciento entrante 1 di augustus 2022. Di e manera aki, e banconan comercial mester tene un balansa minimal na BCA cu ta igual na 24,0 porciento di e depositonan riba termino cortico di nan clientenan. E decision aki ta basa primordialmente riba e caida y tendencia di bahada spera den e nivel di likides excesivo na e banconan comercial.
Reservanan internacional
Reservanan internacional, cu ta consisti di reservanan oficial di BCA y reservanan di divisa na e banconan comercial a subi cu Afl. 329.0 miyon riba 1 di Juli 2022, compara cu fin di December 2021. E reservanan oficial a aumenta cu Afl. 233,5 miyon durante e mesun periodo, mientras e reservanan teni pa banconan comercial a subi cu Afl. 95,5 miyon. Consecuentemente, riba 1 di Juli 2022, e reservanan oficial y internacional a suma Afl. 2.978,4 miyon y Afl. 3.458,6 miyon, respectivamente. Pa e resto di 2022, BCA ta premira expansion den e reservanan oficial y internacional debi na mas entrada di divisa relata na turismo y un recogemento den inversion procedente di exterior. Mantencion di un nivel adecua di reservanan (door di, entre otro, e reserva obligatorio) ta critico pa mantene e tasa di cambio fiho entre e florin Arubano y e dollar Mericano. Relata na esaki, BCA ta anticipa cu reservanan internacional lo surpasa ampliamente tres luna di pago riba e cuenta coriente di e balansa di pago (cu ta consisti di pagonan pa importacion, pago di interes na inversionistanan stranhero, y transferencianan pa exterior manera placa manda afo door di trahadornan stranhero).
Ta proyecta cu e reservanan oficial tambe lo permanece dentro di e margen aceptabel basa riba e metrico ‘Assesing Reserve Adequacy’ (ARA) di e Fondo Monetario Internacional (FMI). Actualmente, e nivel di reservanan di divisas a keda adecua door di e fluho di divisas ricibi door di Gobierno di Aruba na Maart 2022 y e prestacion fuerte y continuo di turismo. Den e delaster parti di aña, Gobierno di Aruba lo uza e fluhonan aki pa paga fiansanan internacional cu a vence.
Inflacion
Na mei 2022, e Indice di Prijs di Consumo (IPC) tabata 5,2 porciento mas halto compara cu e mesun luna di e aña anterior. E aumento aki tabata causa primordialmente door di e aumento den prijs di gasolin, cu a afecta e componente di ‘transporte’ (contribuyendo cu 2,6 punto di porcentahe). Ademas, otro componentenan a contribui na e inflacion, esta ‘cuminda y bebida no alcoholico’ (contribuyendo cu 1,0 punto di porcentahe), ‘operacion di vivienda’ (contribuyendo cu 0,5 punto di porcentahe), ‘paña y sapateria’ (contribuyendo cu 0,3 punto di porcentahe), ‘restaurant y hotel’ (contribuyendo cu 0,3 punto di porcentahe) y ‘otro bienes’ (contribuyendo cu 0,3 punto di porcentahe).
Na final di Mei 2022, e inflacion midi riba promedio di 12 luna a subi te na 3,0 porciento y ta proyecta pa aumenta durante 2022 tanten cu banconan central no logra trece inflacion bao di control riba termino cortico y no resolve e problemanan di abastecemento. Mientrastanto, na Mei 2022, inflacion basico (excluyendo cuminda y energia) a yega 2,7 porciento si midi e final di respectivo luna contra e luna di e aña anterior. Basa riba un promedio anual esaki a yega na 1,3 porciento.
Likides excesivo na banconan comercial
E total di likides excesivo na e banconan comercial a baha di Afl. 1.320,5 miyon na december 2021 pa Afl. 1.037,7 miyon na Mei 2022. E caida significante aki den likides excesivo ta debi primordialmente na e subida consecutivo den e reserva obligatorio door di BCA durante e prome cinco lunanan di 2022. No obstante, e nivel di likides excesivo a keda significantemente mas halto cu e nivelnan midi prome cu e pandemia (+ Afl. 348,6 miyon). Esaki tabata a causa di e nivel eleva di fondonan di likides (cu ta inclui cash, bononan di gobierno y otro activo likido) na banconan comercial, amplifica door di e nivel abao di demanda pa credito. Sinembargo, financiamento local di proyectonan relata na turismo probablemente lo crece den e di dos mita di 2022. Esaki probablemente lo pone presion adicional riba e nivel di likides excesivo na e banconan comercial, Banco Central di Aruba a informa.
