A cuminsa un debate fuerte encuanto e ponemento di BBO si of no riba factura, entre e gremionan empresarial y e mandatario responsabel di financia. Di un banda nos por tin comprension pa cierto argumento di ambos banda, pero nos ta keda cu e inkietud cu nos no ta hayando henter e storia. Y pa informa otro hende, nos mester ta na altura. Anto, nos ta bay analisa mas aleu.
E controversia a cuminsa aña pasa, tempo cu e minister encarga a inclui den e cambionan di ley di BBO y ley di BAZV tambe e decision cu no ta permiti mas pa pone BBO, BAZV ni BAVP riba factura. Inmediatamente a bin resistencia for di comercio, cu ta argumenta cu pa tanto aña nan ta custumbra caba cu e sistema, cu segun nan ta añadi na transparencia, den e sentido cu e cliente por sa exactamente loke ta bay pa gobierno pa impuesto y loke ta paga e empresario.
Di otro banda e mandatario tambe ta referi na transparencia, pero den otro sentido. Ta argumenta cu e cliente den tienda tin derecho riba transparencia den e sentido cu ora na bay caha no tin sorpresa mas. Dos diferente tipo di ‘transparencia’ cu naturalmente no ta bay hunto.
Lastima pa ambos banda, nos tin nos propio pensamento di e asunto aki. Tempo cu tabata haciendo preparacion di e ley di BBO, tambe a surgi e discusion aki. E ley di BBO di Sint Maarten cu a sirbi como modelo pa esun di Aruba no ta permiti pone e BBO riba e recibo. E empresario ta pone su prijs, cobra esaki y ta paga e porcentahe di BBO riba e suma cobra na Belastingdienst. Presion di banda empresarial na Aruba a conduci na permiso pa pone BBO riba factura, pero esey a crea caba dos opcion pa factura… Despues a bin BAZV, cu mester aparece riba e factura, pero no ta necesario pa añadi esaki na e suma total. Anto, si algo ta costa Afl. 100, bo por simplemente cobra e suma ey, y paga BBO como empresario riba e suma ey. Di otro banda, por añadi e porcentahe na e suma total, pero teniendo cuenta cu Impuesto ta cobra riba e suma total cu tin riba e factura. Total: basta complica caba… Ora cu mester a contempla e adicion di BAVP na e rosario aki, e situacion lo a bira mas complica ainda. Mescos cu BBO lo tin dos opcion, o lo a sigui e modelo di BAZV…? Nos no sa si esaki a conduci na e decision pa bay completamente di regreso na e origen, estilo Sint Maarten, pero en todo caso no a comunica esey na nos. Nos ta custumbra caba cu e talentonan pa comunica e tipo di cos aki na un manera adecua ta hopi scars, sigur den gobernacion. Asina nos a yega na e momento aki, cu ambos banda reclamando nan version di transparencia y kier haya rason. Nos no sa unda e cos aki ta bay caba.
Mientras tanto, lo no ta util pa nos cuminsa kibra cabes riba loke berdaderamente ta importante? Segun nos opinion e asunto di con pa factura ta un asunto secundario, cu no ta yuda pa nos mantene nos atencion riba e bala, y no riba e hungado, manera tur bon futbolista sa. E pregunta grandi, y hopi mas importante pa comercio y pa nos como ciudadano, ta kico ta bay ta e proximo tipo di impuesto indirecto, despues di e BBO? Aki ta unda e banda gubernamental ta fayando completamente lagando tur hende den scuridad, no comercio so sino henter pueblo, kico ta e proximo paso. Di mes caba nos no ta kere cu ta factibel ni deseabel pa introduci un ley nobo a corto plaso, loke no por tampoco pasobra pronto parlamento lo ta den reces, ademas cu e ley nobo no a cuminsa su trayecto legislativo obligatorio tampoco. Asina ta, proximo ocasion ta 1 di januari 2020… si cuminsa na tempo.
Loke nos no por comprende pakico no ta duna claridad pakico a bin cu e decision pa kita e BBO for di factura. Pa nos ta un splicacion sensato tin y esey ta cu a hacie pasobra den e sucesor di e BBO ta bay maneha e asunto mescos, esta sin pone nada riba factura. Pero manera semper, secreto ta mas importante cu claridad, cu gobierno scondiendo tras di e argumento cu ‘nan no a dicidi ainda’. Loke nos por observa cu practicamente no tin discusion tocante kico lo ta e sistema di cobra impuesto den e proximo añanan, un asunto strategico no solamente pa e specialistanan sino algo di interes general, mientras asina tanto energia ta bay den e debate secundario aki di BBO riba recibo of no.
Si di berdad comercio ta desea un debate fructifero cu e mandatario, ta mas importante pa papia ki rumbo henter e pakete di reforma fiscal ta bay tuma, unda ta imposibel pa acepta cu ta bisa frescamente cu esey lo haya sa na su debido tempo, manera CAft tambe por a haya di tende di e mandatario recientemente. Ta e actitud di imposicion aki cu no ta yuda pa crea base di apoyo pa e decisionnan cu gobierno mester tuma proximamente.
