BBC ta nombra ex-hues pa lidera investigacion riba entrevista cu prinses Diana na 1995

Hunta directivo di BBC a aproba e nombramento di un hues senior retira pa lidera un investigacion independiente riba e circunstancianan rond di un entrevista di television na 1995 cu prinses Diana, e compania a bisa ayera.

E anuncio a yega despues cu ruman homber di Diana, Charles Spencer a renoba su acusacion e luna aki cu periodista di BBC, Marin Bashir a usa declaracionnan forsa y mentira pa convence e prinses pa bay di acuerdo cu e entrevista.

E investigacion lo considera si stapnan tuma pa BBC y Bashir tabata apropia y na ki grado e accionnan ey a influencia e decision di Diana di duna un entrevista.

John Dyson, ex hues di Corte Supremo, ta ‘un figura eminente y altamente respeta kende lo lidera un proceso profundo’, BBC a bisa.

Charles Spencer a bisa cu den e simannan prome cu e entrevista 25 aña pasa, Bashir a haci declaracionnan falso y difamatorio tocante miembronan senior di famia real pa asina gana su confiansa y haya acceso na su ruman muhe.

E declaracionnan en cuestion ta inclui cu celular di Diana tabata interveni y cu su guardaespalda tabata conspirando den su contra. El a bisa cu Bashir a mustr’e ‘documentonan falso di banco’ cu supuestamente tabata mustra cu dos ayudante real senior tabata siendo paga pa spiona Diana.

Charles Spencer a exigi un investigacion y un disculpa. BBC a ehecuta un investigacion interno na momento cu e acusacionnan a presenta pa prome biaha y a bisa cu Bashir a admiti di comisiona documentonan falso. Pero e corporacion a bisa cu e documentonan no a hunga un rol den decision di Diana di participa den e entrevista.

Director general di BBC, Tim Davie, a bisa cu e BBC ‘ta determina pa yega na e berdad di e eventonan aki’.

E entrevista na 1995, den cual Diana famosamente a bisa ‘tabatin tres di nos den e matrimonio aki’ – referiendo na e relacion di prins Charles cu Camilla Parker-Bowles – a ser mira pa miyones di persona y a genera shock den e monarkia.

Diana a divorcia di Charles na 1996 y a fayece na Paris den un accidente di auto na 1997, mientras paparazzi tabata siguie. Charles a casa cu Camilla, ken awo ta dukesa di Cornwall, na 2005.

BBC a bisa cu Bashir, di 57 aña, kende actualmente ta su editor di religion, ta a.o. pasobra e ta recuperando di cirugia di curason y complicacionnan relaciona cu Covid-19 cu el a contrae e aña aki.