(AP) – Anteriormente BDA a publica e noticia tocante un presentador di BBC, ken a ser gara cu imagennan indecente di muchanan. Recientemente, The Associated Press a publica BBC su reaccion y banda di medaya, mirando cu e persona en cuestion tabata un di e personanan cu tabata representa e noticiero.
BBC a bisa cu nan ta den shock cu e comportamento di e ex presentador, ken tabata un presentador di noticia top den e compania, Huw Edwards. Edwards a admiti diaranson cu e tabatin acceso na imagennan indecente di muchanan cu a ser manda p’e via WhatsApp.
Durante un audiencia di 26 minuut largo na Westminster Magistrates Court na London, e homber di 62 aña, a declara su mes culpabel na 3 acusacion di crea imagen indecente di muchanan.
El a ser laga den libertad te ora cu su audiencia pre-sentencia tuma luga dia 16 di september y por enfrenta te hasta 10 aña den prizon, aunke fiscalia a concede cu un sentencia suspendi por ta apropia.
Corte a ser bisa cu 377 imagen sexual di muchanan a ser manda pa Edwards riba WhatsApp entre december 2020 y augustus 2021. Di nan, 41 tabata imagen indecente di muchanan, incluyendo 7 considera parti di “Category A,” cual tabata esnan hopi mas indecente, cu e edad calcula di e muchanan entre 13 pa 15. Un di e muchanan tabatin entre 7 pa 9 aña.
“BBC ta den shock cu e detayenan cu a surgi den corte awe,” e noticiero a bisa den un declaracion. “Actualmente no tin luga pa e tipo di comportamento aki y nos pensamentonan ta cu tur esnan afecta.”
Edwards su admision di culpa ta marca un caida dramatico. Despues di a cuminsa na BBC Wales 40 aña atras, Edwards tabata e anfitrion lider di BBC su noticiero nocturno pa 2 decada y a lidera e noticiero publico su cobertura di e funeral di Reina Elizabeth II den aña 2022 ademas di specialdi eleccion.
Como un di e personanan cu salario mas halto na BBc, el a ser suspendi den juli di 2023 pa acusacionnan haci aña pasa y a retira den april a causa di condicion di salud. No a trece ningun acusacion formal dilanti relaciona cu e acusacionnan aki.
BBC a revela cu el a ser informa den november “den confiansa” cu Edwards a ser deteni bao sospecha di ofensanan serio y laga den libertad mientras polis ta sigui e investigacion. El a agrega cu e lo a despedi su persona si e lo a ser acusa.
A keda revela anteriormente e siman aki cu el a ser acusa den fin di juni, tempo unda cu e “no tabata un empleado di BBC mas,” e noticiero a bisa.
Sophie Raworth, ken tabata presentando noticia riba diaranson a enfatisa cu e departamento di noticia di BBC ta independiente. El a bisa cu nan a haya sa conhuntamente cu tur otro hende di e acusacionnan contra Edwards riba dialuna, ora cu polis Metropolitano a revela cu e lo presenta den corte diaranson.
Despues di Edwards su admision di culpa, polis a identifica e homber cu a manda e imagennan como Alex Williams, di 25 aña. El a ser sentencia na 12 luna den prizon suspendi na Merthyr Tydfill Crown Cour na Wales den maart, despues di a declara su mes culpabel na posesion y distribucion di imagennan indecente ademas di posesion di imagennan prohibi di menornan.
Un investigacion contra Edwards a cuminsa despues cu un celular confisca a revela su participacion den un combersacion di WhatsApp, polis a bisa.
