Joase-Ann van der Biest di Baz-rrr Gallery a ofrece un conferencia di prensa diabierna pasa, pa duna di conoce algun proyecto cu tin pa clausura di aña y cu ta enfoca riba sostenibilidad den comunidad.
El a splica cu diaranson 27 di november nan lo presenta SDG Breakout Session pa asina educa y stimula e comunidad pa participa den Sustainable Development Goals (SDGs) di Nacionnan Uni. Tara Alwani, kende ta invitado principal di e charla aki y SDG Goal Keeper, cual ta un persona cu ta busca promove educacion pa logra menos pobresa na Aruba.
Den e mesun edicion aki, tambe lo tin presentacion di studiante di Internacional School of Aruba, cual a haci di SDG un hecho pa asina e studiantenan por compronde miho su aplicacion den comunidad ora di papia inclusion di tur hende pa compronde SDGs.
Van der Biest tambe a trece dilanti cu e proyecto ta mara pa crea un biblioteca. Di e manera ey nan ta buscando bukinan di mucha di scol basico, entre 5 pa 13 aña na Hulandes y Papiamento, cu e fin di instala un proyecto pa honra muchanan di Maria School na Santa Cruz. E idea ta pa tur mucha por yega na un biblioteca cu diferente materia.
El a destaca cu na Aruba hopi mucha no tin acceso na un biblioteca pa motibo di nan situacion financiero of situacion na cas. E proyecto ta pa studiantenan por sigui cu e proyecto sostenibel aki a traves di SDG.
El a informa cu e idea di proyectonan di SDG ta cu e no por ta un proyecto cu no tin un consecuencia positivo su tras. Si ta cuminsa un dia, e mesun dia e tin cu finalisa. Tambe el a bisa cu ya caba nan tin 100 buki na Ingles y nan ta buscando di Papiamento specificamente y Hulandes, pa asina e muchanan por conoce mundo general for di literatura, cu ta hopi importante.
Tocante Aruba, Van der Biest a comenta cu e pais ta riba bon caminda, importante ta cu tin diferente tipo di organisacion cu ta trahando duro riba SDG pa cu educacion di comunidad. E cos mas importante ta pa por tin un comunidad sostenibel y comunidad den general mester contribui. Si algun hende por contribui cu un di e 17 SDG, cu ta su pasion y cu ta haci cambio den su bida, esey ta un granito di arena cu ta hiba nos pais riba e caminda corecto.
El a felicita un compania di ijs cu den dianan aki a distribui saconan nobo di ijs pa haci un cambio riba mentalidad di hende y mira con nan carga cu elemento di ‘life on land life underwater’ y asina crea un movemento.
Van der Biest a bisa cu nan ta haci nan maximo esfuerso pa muchanan tin conocemento riba loke ta trata cuido di medio ambiente. Tambe nan a haya varios buki cu ta trata di sostenibilidad y e idea ta pa inculca esaki den lesnan di arte.
Ademas di esey, van der Biest a comenta cu tambe nan ta promove otro SDG, cu ta ‘Educacion como clave’ pa tin menos pobresa na Aruba. Na mesun momento el a anuncia cu 29 di november lo tin Climate Action Aruba na Wilhemina Park, comunidad tin cu compronde con tur personalmente por salba e planeta.
Van der Biest a splica cu na december tambe lo tin otro evento na Baz-rrr Gallery cu e idea di hiba mas movemento pa centro di ciudad cu ta Oranjestad y hiba mas fluho pa comerciantenan di e cercania di Baz-rrr.
El a señala cu tambe ta representa Fundacion Creciendo, cu hunto cu Galeria Baz-rrr ta haci proyectonan di arte y cultura na e momentonan aki, unda e hobennan cu ta asisti por uza arte pa conoce nan talento. “No tur mucha ta haya e oportunidad pa haya arte accesibel for di cas”, pa e motibo aki, el a expresa cu arte ta wordo uza como un medio di motivacion y inspiracion.
“P’esey ta hopi importante pa lanta e chispa ey den nan, pa nan por sigui crea, pasobra si no ta yega un punto cu mescos cu otro carera, no lo bay tin mas artista of muchanan cu ta aspira pa bira artista”, el a sigura.
