Bayendo urna electoral… Bon informa…?

Faltando un dia pa Aruba acudi na urna electoral pa dicidi ken ta haya suficiente voto pa drenta parlamento y pa por ta (parti di) e proximo gobierno. Aunke un evaluacion completo por tuma lugar solamente despues di eleccion, ya nos por mira si loke ta e cosnan cu a resalta durante e campaña mes. Kico ta por ehemplo den e campaña actual, compara cu e anterior campañanan reciente? Cu e biaha aki nos ta mira hopi menos bandera y otro material di propaganda politico. Esey ta bon o malo? Nos lo bisa bon pasobra un proceso electoral, cu tin tur cos di haci cu opinion di e ciudadano encuanto ken lo ta mihor pa dirigi e pais den e periodo nos dilanti, en principio no tin mester di depende di bandera y bochincha riba caya. Cuanto bandera tin di cierto color y cuanto sound system ta utiliza pa pone decibel den oido di e ciudadano, segun nos finalmente no tin tanto influencia riba kico un persona ta pensa. Algo mas cu a capta nos atencion ta cu ta un partido so tin un cantidad grandi di material politico, esey ta e partido mayoritario den e actual coalicion demisionario. Na momento cu gobierno a cay, nan tabata prepara pa eleccion y hopi otro no. Esey particularmente pasobra e proximo eleccion lo tabata na juni 2025 y pa di dos biaha gobierno ta cay di forma prematuro, garando varios partido di sorpresa.

Otro aspecto di campaña tabata e grado, mas tanto deficiente, di informacion na e ciudadano, pa por huzga cu conocimento ken duna nan confianza. Nos no a keda impresiona, mirando cu a circula comentario totalmente excesivo y innecesario, por ehemplo e discusion si e ‘lijsttrekker’ di e partido democrata cristian ta e lider di partido, o esun cu a opta pa bay na puesto 29 riba lista. E asunto a cuminza cu un discusion totalmente inutil fomenta pa Camara di Comercio, cu como instancia serio lo mester tabata sa mihor y acepta cu e partido menciona ta manda su number uno riba lista pa debate, envez di entama henter un ‘debate previo debate’ ariba e issue aki. Un partido politico na Aruba pa ley ta un persona huridico,un asociacion, cu den asunto legal mester ta representa pa su presidente, cu no necesariamente ta aparece riba e lista mes. Den asunto manera un debate e persona huridico ta liber pa designa e persona di nan preferencia, punto. Camara di Comercio no tin nada ta dicidi ta ken ta pone dilanti como lider, cu no ta un funcion oficial den e asociacion.

Pero recientemente e asunto a sigui, ora den un entrevista a puntra e number uno, den caso nan por forma gobierno, si ta number uno o number 29 ta bira promer ministro. Segun nos opinion e politico nobato aki a perde e oportunidad di educa tanto e locutor como su audiencia, bisando cu segun e sistema electoral cualkier ciudadano na Aruba, cu ta cualifica pa bira ministro, por ta promer ministro tambe. Importante ta cu pa bira ministro no ta existi e exigencia cu bo mester a aparece riba un lista politico, mucho menos cu bo mester ta parlamentario pa bo por bira ministro. E contesta cu no a duna lo tabata: “Nos lo dicidi internamente ken lo bira, dia y ora nos yega asina leu…” Si politico(nan) no asumi nan papel di informa publico debidamente, ainda prensa ta keda cu e responsabilidad eterno ey…

Otro tema cu nos a sinti su ausencia den e debate politico ta e tema di ‘transparencia’. Pa no comprende nos robez, asina leu cu nos sa, tur partido ta hiba ‘transparencia’ como lema den nan propaganda. Sin embargo, esey ta leu di e realidad di lucha, denuncia y protesta contra falta di transparencia. Ehemplo, cu a proposito a bin dilanti varios biaha den e medio aki, pasobra e ta afecta nos trabao tambe: Pakico ta keda un problema pa gobierno ordena TUR entidad estatal y semi-estatal, y TUR esunnan cu ta haya subsidio di gobierno pa publica nan relato y cuenta anual? Esaki no ta costa un cent preto pasobra tur e documentonan aki ta redacta primeramente den forma digital; no bin bisa anto cu no por. Ademas varios instancia den secor publico si sagradamente ta cumpli cu e tarea di publica, den cierto caso pa obligacion legal, otro pasobra ta sinti cu nan tin un obligacion moral cu comunidad. Caso ironico, hasta ridiculo: WEB Aruba NV ta pone semper su cuenta anual riba su website, pero esun di Elmar y Utilities ta ‘nowhere to be found’. WEB ta publica solamente pa obligacion contractual cu un prestamista, pero dentro di e agrupacion dirigi pa Utilities ta keda reina e conocido secretismo gubernamental. Nos a tende eventual proximo parlamentarionan pone nan apoyo pa transparencia den practica y cuminza exigi cu parlamento ta haya tur e cuentanan aki tur aña, sin mester di cana caminda di cruz. Asina leu cu nos sa, nunca ningun parlamentario a tuma e iniciativa aki pero a limita nan mes na ‘transparencia’ como lema (bashi) pa impresiona pueblo. P’esey tambe e siguiente pregunta: con bo ta bay sinta den parlamento, supuestamente pa ‘controla gobierno’, si bo no tin ni idea di loke ta pasando den gobernacion, den henter sector publico? Ta bon pa tur parlamentario cu desde mañan ta resulta ganador di un di e 21 puestonan, comprende cu si pueblo votador kier mira un cambio, nan tarea no ta limita na vota ‘pro’ o ‘contra’, ni insulta nan adversario, sino exigi e informacion necesario pa por representa nos dignamente.