Un bayena Beluga haya cu un harnes preta, cu tabata mustra traha na Rusia, a causa alarma cerca oficialnan Noruego, y a lanta speculacion cu e animal lo a bin di un facilidad militar Ruso.
Joergen Ree Wiig di e Directorado Noruego di Pisca ta bisa cu riba e harness ta skirbi ‘Equipent St. Peterburg’, y por monta un camara riba dje. El a bisa ayera cu piscadonan den Noruega Artico siman pasa a reporta e cetaceo domestico cu un harness preta ta landa rond. Diabierna, piscado Joar Hesten, cu ayudo di Ree Wiig, a bula den awa friu pa kita e harnes.
Ree Wig a bisa cu ‘hende den milicia di Noruega a mustra gran interes’ den e harnes.
Audun Rikardsen, un profesor na e Departamento di Biologia Artico y Marino na e Arctic University of Norway na Tromsoe, nort Noruega, ta kere cu ‘mas probablemente e marina Ruso na Murmansk’ ta involucra. Rusia tin facilidadnan militar mayor den y cerca di Murmansk riba e Peninsula Kola, den e nort west lehano di Rusia.
No tabata inmediatamente conoci kico e animal tabata train pa haci, of si e ta supone di forma parti di algun actividad militar Ruso den e region. Rikardsen a bisa cu el a check cu academiconan na Rusia y Noruega y nan no a reporta ningun programa ni experimento uzando bayena beluga.
“Esaki ta un animal domestico cu ta custuma di haya cuminda sirbi, pues esey ta e motibo cu el a acerca e piscadonan”, el a bisa. “E pregunta awo ta si e por sobrevivi buscando cuminda pa su mes. Nos a mira caso unda otro bayena cu tabata den captividad Ruso ta logra sobrevivi.”
Hesten a bisa e noticiero Noruego NRK cu e bayena a cuminsa frega su mes riba e boto ora el a mir’e pa prome biaha. Rusia no tin un historia di uza bayena pa proposito militar, pero Union Sovietico tabatin un programa completo pa train dolfijn.
Union Sovietico a uza un base na Sevastopol den peninsula di Crimea durante Guera Friu pa train e bestianan pa propositonan militar, manera busca mina of otro obheto, y planta explosivo. E facilidad na Crimea a wordo cera despues di e collapse di Union Sovietico, maske reportenan sin nomber poco despues di e anexacion Ruso di Crimea a indica cu esaki a bolbe habri.
Ministerio di Defensa Ruso a publica un oferta publico na 2016 pa cumpra cinco dolfijn pa un programa di training. E oferta no a splica ki sorto di tarea e dolfijnnan lo mester realisa, pero a indica cu nan mester tin bon djente. El a wordo kita for di internet poco despues di su publicacion.
