(MensHealth) – Dietanan confundi y pseudo-expertonan pa añas a purba di tacha e humilde batata como un cuminda cu ta haci bo gordo y sabotia bo nivel di sucu den sanger. Ignora e mentira. Stop cu e culpa. Ciencia di berdad ta sostene e poder nutritivo di batata – den henter su delicioso gloria.

Si bo kier sa e momento exacto den cual reputacion di batata a bay di berdura saludabel na pariah nutritivo, bay back na 1981, tempo cu dos medico a inventa e glycemic index. Conoci como GI, e sistema aki a asigna un balor numerico na cuminda basa riba e grado na cual nan ta afecta bo nivel di sucu den sanger. Si un cuminda tin un balor GI halto, e cuminda aki por causa e nivelnan aki pa aumenta. Pa persona cu ta sufri di diabetes, e aumento y decenso cu ta sigui por ta peligroso. Pa resto di hende, cuminda cu GI halto ta hunga yoyo cu bo nivel di sucu y por conduci na diabetes.

Pues ta sigui cu mester evita cuminda cu nivel halto di GI: cornflakes, aros, y… batata blanco. De hecho, un batata russet cushina den forno ta carga un di e nivelnan glycemico mas halto di tur – mas cu un chuculati Snickers, Coca-Cola y hasta pan blanco procesa.

Pero despues na 2011, un estudio den New England Journal of Medicine a haci cosnan pio ainda lansando esaki: “Productonan di batata (cu tin tiki sucu y hopi starch (carbohidrato) a mustra e asociacionnan di mas grandi cu aumento di peso.”

Y asina batata, awo considera un cuminda cu GI halto y hopi carbohidrato pa comunidad cientifico, a bira un obhetivo facil pa defensornan di dieta low-carb keto y paleo buscando pa elimina carbohidrato pa baha peso. Herbi, den forno, hash, machica y specialmente hasa – batata, e acusadornan a bisa, lo converti bo six-pack den un bala gigante.

Excepto cu e ciencia nutricional aki no tabata completo en absoluto, y no ta tene cuenta cu descubrimentonan recien of consideracionnan di sentido comun. Un batata mediano den forno ta duna 6 gram di proteina y cuatro gram di fibra, como tambe nivelnan halto di calcium, potassium y vitamina C – tur esaki pa apenas 265 caloria.

Batata ta barata y disponibel tur caminda, ta dura varios luna si ward’e bon, y – manera tur hende cu a yega di disfruta di un porcion bon traha di batata machica of gnocci al dente sa – ta increiblemente delicioso y satisfactorio.

Pa loke ta e GI, expertonan ta bisa cu a malusa esaki y no semper a aplik’e adecuadamente. “Usualmente nos ta come batata como parti di un cuminda mescla. Pues nos por come un batata cu mas fibra y vet, loke ta reduci e aumento den bo nivel di sucu”, segun Danielle Meyer, R.D., director clinico di Dietetic Internship na Universidad di Buffalo.

Es mas, na 2018, ora cientificonan Britanico a evalua e totalidad di investigacion riba batata, obesidad, diabetes tipo 2, y malesa di curason, nan a haya cu demasiado estudionan tabata contradeci otro y no tabatin detaye riba metodo di cushina.

Ademas, cantidad di e reportenan no a tene cuenta cu saciedad, e termino cu dietistanan ta usa pa describi keda yen despues di un cuminda. “E humilde batata por ta un componente cu ta yena bo y provee nutriente den bo cuminda”, segun Mindy Haar, PhD., R.D.N., un fellow na Academia di Nutricion y Dietetica.

Pa loke ta e starch, batata ta contene un tipo poderoso – starch resistente – cu bo curpa no por kibra lihe den glucose, manera ta haci cu e starch di por ehempel pan blanco.
Starch resistente ta pasa door di intestino chikito sin digeri y ta fermenta den intestino grandi, alimentando e bacterianan bon den bo tripa. E ta funciona manera un fibra soluble, yudando bo come menos durante dia.

Loke ta un motibo mas pa disfruta batata.