Basha Foundation ta un fundacion cu tin como meta pa promove y aporta na performance art. Miembronan di e directiva ta conta Bon Dia cu e rol di industria creativo ta uno sumamente importante pa por fortalece otro industrianan, entre otro turismo. Tambe nan a subraya cu no obstante cua gobierno nobo sinta, nan ta spera cu por mantene bon relacion cu esnan bogando pa reconoce cultura como un industria den su mes.

Manera nos a reporta caba, e fundacion a celebra un total di 10 aña di existencia di nan Poetry Nights 2 luna atras. Na fin di september e fundacion a organisa e anochi na unda pa hopi aña tabata tene esaki, Cuba’s Cooking. Durante ultimo 2 aña cada evento tabata wordo organisa na diferente luga rond di Aruba pa asina trece bida na luganan menos conoci. Entre nan, BEAM Creative Center, Cosecha, Baranca di Yerba y te hasta Seroe Colorado.

Nos a papia cu miembronan di directiva di e fundacion Maria Silva y Olga van Bochove kendenan a conta nos di e metanan cu nan tin como fundacion.

Cambio den mentalidad

Segun sra. Silva, hopi biaha e mentalidad den comunidad ta uno cu ta trata e disciplinanan artistico como un hobby. E mentalidad aki tambe sa manifesta den gobierno y otro instancianan cu no ta comparti e punto di bista di personanan cu ta profesional den industria creativo mes.

Aki sra. Silva a subraya cu e unico manera con e directiva y e otro personanan envolvi cu e fundacion por eherce nan trabou a base boluntario ta pa medio di tin nan trabou independiente den industria creativo. “Hopi biaha hende no ta realisa e vinculonan cu tin entre industria creativo y otro industrianan. Por ehempel trabou di marketing y public relations tambe ta un trabou creativo”.

Alabes e impacto economico di industria creativo no ta wordo enfatisa suficiente, segun sra. Silva. “Bo ta haya bo mes enfrenta cu un mentalidad di caridad ora ta trata di artistanan of otro persona cu ta eherce un profesion creativo. Pero mi ta kere mas bien manera tur otro inversionnan cu wordo haci, bo tin cu wak bon kico bo lo por haya bek p’e”.

E no ta trata solamente cu duna placa pa aporta na un persona su cartera, si no tambe pa medio di keda proactivo den e artista su carera. “Nos escritornan, nos videographers, nos artistanan plastico y programmeurnan tur ta merece pa nos ta mas envolvi den nan careranan. Ora nan tin un evento, nos por percura pa nos invita nos hendenan. Si nan saca un producto nobo nos por share esaki riba social media. Tin hopi manera pa aporta”.

Aunke hopi profesionalnan den marketing ta recomenda pa desaroya creatividad, e mester keda algo autentico, segun sra. Silva. “Enbes di pretende di ta cultural pa medio di bisti un par di hende y pone nan baila, ban forma personanan cu por bin cu nan mesun coreografia. Tambe nos por nutri mas escritornan riba e isla”.

Tayernan na KIA

Sra. van Bochove ta conta nos cu nan a haya un bon aporte di parti di gobierno y otro instancianan caba. Nan lo kier mantene un bon relacion cu cualkier gobierno nobo cu sinta. Pero alabes nan no ta desconta cu gobierno tambe tin su retonan y cu ta imposibel pa complace tur hende. P’esey e fundacion ta purba crece poco poco, y e ta algo cu nan ta logrando caba.

“Antes nos tabata haci e Poetry Nights 3 biaha pa aña, despues nos a cuminsa organisa nan cada 2 luna, te cu awo e ta cada luna”.

E fundacion ta spera den futuro pa organisa tayernan di entre otro escritura pa hendenan den KIA. Ya caba nan a organisa esaki un biaha y nan a haya cu e ta algo cu tin mester di dje. Esaki ta concorda cu e vision di e fundacion encuanto e importancia di creatividad y arte den un sociedad multicultural pa tin comprension entre diferente grupo.