(AP) – Prome cu e acepta un rol, Melissa Barrera ta puntra su mes, “Cua ta e mensahe cu mi ta purbando di manda mundo cu esaki?”

E actriz Mexicano ta internacional cu e proyectonan cu e ta selecta, incluyendo su peliocula mas recien, “Carmen”. E ta un storia di amor musical cu ta inspira pa e opera di George Bizet di aña 1975. E pelicula aki ta tuma luga ambos na e frontera di Merca cu Mexico y na Los Angeles.

Barrera, miho conoci pa e audiencia Mericano pa su rol den e serie di peliculanan “Scream” y e adaptacion den pelicula di “In The Heights” den e pelicula aki ta interpreta e rol di Carmen, un hoben Mexicano. E ta crusa caminda na e frontera cu Aidan, interpreta pa Paul Mescal, un militar marino cu problema post traumatico ken ta trahando como guardia di e frontera voluntario. Un serie di eventonan peligroso ta causa cu nan dos mester core bay hunto.

Barera a bisa cu e tabata facil pa genera un kimica cu Mescal pa motibo cu nan a pasa varios ora ta train baile hunto. “Ora cu bo ta baila cu un hende, bo ta siña conoce nan curpa y con nan ta move, bo ta conecta cu otro, hari, fracasa y bo ta cay,” el a bisa. “E ta un manera completo di por conoce un otro persona rapidamente.”

E pelicula aki ta hiba e audiencia riba un biahe poetico mientras ambos ta purba yega Los angeles. Carmen ta reuni cu e miho amiga di su difunto mama na e sitio y ta haya consuelo en baile y su amor pa Aidan.

E pelicula su cancionnan ta componi pa Nicholas Brittell cu Julieta Venegas, Taura Stinton y Tracy “The Doc” Curry.

Ora cu Barrera a scucha di e proyecto pa prome biaha e no tabata sa di kico e storia lo trata. “Mi a mira cu e pelicula lo ser crea pa Benjamin Millieped y cu e lo bira un adaptacion di ‘Carmen’, esey ta lo unico cu mi tabata sa,” e actriz a comenta. Lunanan despues, ora el a ricibi e guion, el a realisa cu e ta un storia tocante un muhe imigrante cu ta coriendo for di e cartel. Esaki ta un tema cu Barrera tin hopi tempo ta evita, pa motibo cu ora cu el a cuminsa su carera na Merca, e tabata ricibi rolnan cu tabata di migrantenan of rolnan relaciona cu cartel. “Nos e latinonan sempter ta e victima y semper nos ta ilustra den un punto di bista ‘ay, pobrecito’,” Barrera a expresa.

Manera cu el a sigui lesa e guion su dudanan a cuminsa disparce, “mi a cuminsa pensa cu esaki ta diferente. E ta un storia romantico y poetico y e ta bay ta un storia conta cu movecion y baile,” el a conta. Ora el a puntra su mes “cua ta e mensahe?” den e caso aki, Barrera a bisa cu e ta “e suplica di un muhe como varios otro muhe cu ta na e frontera actualmente, cu ta coriendo for di peliger y ta purbando di haya un miho bida y haya su libertad, siguridad y amor, cual ta loke tur ser humano kier.”