(AP) – Actor Sacha Baron Cohen a retira e demanda den contra di un tienda di cannabis na Massachusetts cu a usa un imagen di su personahe Borat riba un aviso sin su permiso.
Den e documentonan entrega na Boston Federal Court riba diamars a bisa cu ambos banda a keda di acuerdo pa retira e caso cu a ser treci dilanti aña pasa di parti di e actor conoci pa su rol como personahe principal den e peliculananan “Borat”.
E documento legal no a menciona si a yega na algun acuerdo den e caso aki. Sinembargo e-mail pidiendo comentario a ser manda na e abogadonan di Baron Cohen y e compania en cuestion, Solar Therapeutics Inc. basa na Somerset.
E aviso, cual tabata den forma di un ‘billboard’ a ilustra Baron Cohen como Borat ta pose cu dos duim hisa y e palabranan “It’s nice!” cual ta un di e slogannan di Borat. E aviso aki na Massachusetts a ser kita 3 dia despues cu Baron Cohen su abogadonan a manda un ordo na e compania, segun e demanda.
Su abogadonan tambe a expresa den e keho cu e actor “nunca lo participa den ningun campaña pa promocion di cannabis” y cu e uso di su imagen eroneamente a duna e publico e impresion cu e ta promove y representa e compania su productonan.
Baron Cohen y su compania basa na California, Please You Can Touch LLC tabata pidi 9 miyon dollar den dañonan causa.
