Un grupo di habitante ta protestando contra un negoshi den man di Chines. No ta conoci con grandi e grupo aki ta. Orlando Thijsen ta e persona cu a manda un relato pa prensa hunto cu e carta pa gobierno unda ta exigi pa gobierno no duna e comerciante un permiso.
Nan ta menciona cu tin hopi caso unda diripiente tiendanan den man Chines ta habri. Como cu e comerciantenan ta cumpra tereno/cas destina pa vivienda pero despues ta pidi gobierno pa cambia e destinacion y pidi permiso pa habri negoshi. Segun e carta e habitantenan di Yanana ya a protesta contra e vestigingsvergunning di e negoshi concerni pero a perde. Awor nan ta pleita contra e slijtvergunning cual ta encera cu e negoshi por sirbi alcohol.
Segun e carta cu e habitantenan a manda pa gobierno, specificamente pa minister di Salud Publico cu mester duna e permiso, e situacion ta cu na Yanana 14 e comerciante kier lanta un supermercado, luga di bebe y luga di como. Pero e habitantenan ta bisa cu esaki ta bay contra e plan di gobierno mest. Esey ta e plan cu ta dicidi cua desaroyo den cua area mag di tuma luga, esta e Ruimtelijke Ontwikkelings Plan (ROP).
Ta conoci cu gobierno ni ta tene su mes na e plan aki, por ehempel den e caso di Bubali Plas, Malmok y varios otro caminda. Tambe den e barionan unda ta cambia destino di tereno priva pa uno comercial sin tene cuenta cu e molester pa e bisiñanan.
Den e caso di Yanana e habitantenan ta menciona cu e tienda no tin un permiso pa haci molester (hindervergunning) y tampoco un permiso pa opera un restaurant. “Fuera di esey e Chinees ta den un birada masha peligroso”, nan ta skirbi. Den e carta pa minister di Salud nan ta enfatisa cu e bario ta destina pa vivienda y cu otorgamento di permisonan pa entre otro luga di bebe ta trece hopi situacion peligroso, di insiguridad y molester. “Un otro motibo pa ta contra permiti Yanana 14 funciona como negoshi y specialmente di bebida, ta rebaha balor di casnan di suscritonan.”
Pues asina nan ta pidi minister pa nenga e peticion (-nan) necesario pa e comerciante Chines.
Bon Dia Aruba lo sigui riba e caso aki y purba di haya un reaccion di banda di e comerciante y gobierno.
