Bario di Sero Patrishi den shock y luto

Diasabra den careda di 5or di atardi na e casnan di pueblo na Sero Patrishi, un Hyundai accent blauw a reverse y pasa riba un baby. Ambulance y autoridadnan a haci nan best pa yega hospital mas lihe cu ta posibel, pero lastimamente e mucha a fayece birando e di 10 morto den trafico.

Segun informe di Liliana Rasmijn di KPA, diasabra  pa mas o menos 5:30pm, autoridadnan a topa cu e criatura riba caminda na unda cu e polisnan cu a yega eynan a cuminsa cu un re-animatie. Ambulance a yega e sitio un paar di rato despues na unda cu a bay cu e mucha inmediatamente hospital. ”Polis a logra di habri tur caminda pa yega mas lihe cu ta posibel pero lamentablemente pa 5:55pm., Dr. Arends ta constata morto di G.J.T. Rosa naci riba 12 di November 2015 biba na Sero Patrishi,” segun sra. Rasmijn. Ta asina cu e criatura lamentablemente a fayece riba su prome cumpleaño. E chauffeur a pasa door di un test dibiaha di cual segun sra. Rasmijn el a supla 0 anto el a wordo deteni pa continua cu e investigacion.

Kico a bay robes?
Tin hopi storia andando anto polis cu specialista di trafico tabata presente pa inicia un investigacion pa por haya sa en berdad kico por a pasa y pakico e mucha tabata riba caminda. Na prome instante a wordo bisa cu e auto a reverse pero segun sra. Rasmijn, mester warda e investigacion sali na cla anto wak kico en berdad a pasa. Na e sitio por a tuma nota cu e baby tabata tin un marca di taira na su cabes. Fiscal Pronk tambe a presenta na e sitio y pasa di 6or di atardi a duna ordo pa tuma e baby den beslag pa autopsia. Na e sitio di e accident, departamento forensico a saca potret y tur evidencia.  E mama y casa di e chauffeur a bira malo na e sitio anto mester a pidi ambulance pa nan.

No husga
Na e sitio tabata tin diferente version con e accidente a pasa, te hasta bisiñanan tabata comenta cu constantemente e baby ta riba caya.  Segun diferente comentario riba rednan social, den e cayanan di Sero Patrishi ta algo usual pa mira muchanan ta hunga riba caminda. Aunke cu muchanan hungando riba caminda ta custumber of no den e bario aki, hopi comentario di ciudadanonan di e bario mes como tambe online, ta cu no mester ta lihe pa husga e mayornan. Un persona ta comenta: ”No husga. Paso e mama, tata y wela hamas y nunca lo a desea pa awe nan ser keri a bay laga nan. Stop di husga. Stop di papia palabra pisa contra hendenan cu ta sufriendo.”