E presencia di e botonan conoci como ‘piñero’ cu ta bin for di Venezuela carga cu chatara a bira un problema den waf di Barcadera. Pa dia un promedio di 20 pa 40 di e tipo di boto aki carga cu koper y otro tipo di chatara ta bin Aruba. Pero tin biaha nan ta bin cu productonan di consumo pa ser humano, loke ta creando no solamente un problema di espacio den e waf aki, sino di higiena tambe.

Un di e tipo di boto of piñero aki tabata Quien lo diria cu a zink fin di siman pasa, caminda nan tres tripulante a wordo rescata milagrosamente for di e lama bruto door di e barco “Arcangel Gabriel”.

Director di departamento Maritimo (Directie Scheepvaart), Carlyle De Couteau a declara na Bon Dia Aruba cu nan a tuma nota di e situacion aki a base di informacion di Duana y tambe di Inmigracion relaciona cu e piñero nan cu ta biniendo carga cu chatara pa bende nan na Aruba. Sr. De Couteau a bisa cu nan no a subestima e problema aki, y nan ta atendiendo conhuntamente cu otro departamentonan pa sinta na mesa pa wak con ta bin cu un solucion cu ta traha pa tur hende.

Problema
E problema grandi ta e cantidad di boto cu ta yega y e tamaño di e waf di Barcadera cu nos tin. E situacion fastioso te hasta peligroso ta cu banda di e barconan cu ta trece fruta y berdura, pero tambe pisca y cabaron, bo tin e piñero nan cu ta yega cu tur sorto di chatara y pone nan riba waf caminda stof ta bula.

“Nos mester yega na un solucion. Tin biaha nan ta bin cu chatara plus cuminda”, sr. De Couteau ta laga sa. E parti aki no por ta higienico pa e hendenan haci consumo di dje. E otro problema tin di haber cu den e cantidad di chatara nan por trece camufla cos ilegal manera arma di candela . Pues e problema aki ta demanda un solucion urgente ya cu tin varios componente den dje cu no ta bon.

Diariamente un gran cantidad di boto carga cu chatara ta yega nos waf, pero nan no ta bay di biaha. Nan ta bin, nan ta baha nan carga, y nan ta bay cerca e compania pa bende e materialnan aki. Pero e negoshi aki tin dobel via, pasobra cu e placa di e benta di e chataranan, nan ta bay cumpra cuminda y productonan di primera  necesidad pa bay cu nan pa Venezuela, considerando e escasez di productonan den e pais bisiña aki. Esaki ta demanda cu e boto aki ta keda entre dos pa tres dia drumi na Aruba prome cu nan ta wordo carga atrobe cu e productonan di consumo aki.

Limitacion di waf
Sr. De Couteau ta haya cu e tipo di actividad aki tambe ta contribui pa nos economia por draai.  Pero e problema ta sinta riba e limitacion di espacio den waf. Ya cu si pa ehempel 20 boto ta yega awe y ta keda na Aruba dos pa tres dia, pero e siguiente  dia otro cantidad di piñero ta bin creando un presion grandi riba nos waf di Barcadera.

El a enfatisa riba e punto aki bisando cu “waf di Aruba no ta un extension di e waf di Venezuela”. Y e punto aki mester keda hopi cla pa tur usuario di waf.  Sr. De Couteau a indica cu den un reunion cu nan a sostene rond di e problema aki a keda masha cla tambe cu niun hende kier kibra e negoshi di niun hende, pero tur hende mester sa cu tin limitacion riba kico nan por traha cu nan na Aruba.

“Nos tin un waf di carga chikito y waf di Oranjestad no ta un opcion, nos ta hacie na Barcadera.”

P’esey e ta haya cu ta urgente pa nan por sinta na mesa y busca un solucion pa reglamenta e presencia y estadia di e barconan Venezolano aki carga cu chatara.  E ta kere cu mester bin cu un medida caminda pa siman nan por atende 25 di e piñero nan ey. Mientras cu nan ta na Aruba niun mas di e barconan aki por drenta, te ora cu tin suficiente espacio pa ricibi nan. E ta consciente cu tin diferente interes den e negoshi aki, pero tambe mester tene cuenta kico waf por carga.