Autoridadnan Spaño a anuncia ayera cu nan a intercepta un barco di bandera Venezolano cu 1,2 tonelada di cocaina a bordo, y e detencion di e seis tripulantenan, tur di nacionalidad Venezolano. Esaki ta e di dos golpi dentro di un luna contra un organisacion narcotraficante radica na Colombia, segun informe di AFP.
Den un prome operacion dia 4 di mei a captura otro barco nabegando bao di bandera Venezolano, cu un carga di 2,4 tonelada di cocaina den awanan di Atlantico y a aresta su shete tripulantenan Venezolano.
“Den cuadro di e mesun investigacion, a haya sa cu e narcotraficantenan tabata conta cu otro embarcacion cu un importante cantidad di droga dirigi riba mercado Spaño y Europeo,” e ministerio di Interior a splica den un comunicado.
E di dos embarcacion a wordo aborda den madruga di 4 di juni den awa internacional di ocean Atlantico, na 800 miya (1.280 km) di islanan Canaria, mientras cu e tabata caminda pa Spaña, un portavoz di Polis Nacional a declara.
Den e operacion a colabora oficina anti droga di Merca, DEA y e Agencia nacional contra crimen Britanico (NCA), segun ministerio. E cargamentonan di droga tabata pertenece na un red narcotraficante radica na Colombia, cu tabata tratando di transferi nan na un organisacion Spaño. Den e ultimo barco captura, e cocaina tabata hinca den 40 bultonan cu mara na otro y pega na dos anker cu e intencion di por benta nan na lama pa nan por sink den e tempo mas cortico posibel,” e comunicado a indica.
De hecho, dos di e tripulantenan a trata di tira e carga na lama “prome cu a aresta nan hunto cu e otro cuatro personanan cu tabata a bordo”, el a declara.
Ademas, un di shete persona, “vincula di forma directo cu e envio y financiamento” di e barco, a keda deteni pa autoridad Venezolano na e pais aki.
