Un alarma di e capitan di barco Fenix diadomingo marduga a resulta un conflicto laboral. E tripulantenan no tabata contento cu no tabatin bista riba trabou. E barco ta nabegando bou di bandera di Topa. 3.20 am e capitan a pidi ayudo pasobra su tripulantenan a secuestr’e. E barco tabata mas o menos 4 miya zuid di Barcadera. Autoridadnan di Aruba a subi e barco y a haya un otro situacion. Esaki Cuerpo Policial ta informa. Segun polis lo siguiente a pasa:
“Na tur polisnan a conta 11 miembro di tripulacion, di cual 9 ta di nacionalidad Dominicano, 1 di Argentina y 1 di Nicaragua. E capitan a declara na Polisnan cu dia 16 di november nan a sali for di Republica Dominicano direccion Aruba. E peticion di e compania doño di e barco tabata pa nan a nabega y pa staciona den awanan teritorial di Aruba, sperando nan siguiente trabou. Dos dia despues, esta dia 18 di november ya nan a acerca awanan teritorial di Aruba, pero a opta pa keda afo. Diasabra 28 di november nan a drenta awa teritorial di Aruba y a pidi nan agencia local, esta e compania Wevco pa atende algun asunto pa nan, pero a haya di compronde cu Wevco no ta nan agencia mas y no sa kico lo sosode mas cu nan tampoco.
Mirando e circunstancianan aki, e tension abordo a bira di tal forma cu e tripulantenan no tabata mucho contento mas cu e capitan pasobra e no por a brinda nan siguransa di kico lo sosode cu nan awor. Polis a atende cu e capitan riba e hecho cu el a meld cu e barco ta secuestra, locual ta resulta cu no ta berdad. El a splica cu como cu e compania doño di e barco no ta dunando nan oido, el a sinti comosifuera cu e tabata secuestra.”
Fuel ilegal
E sistema AIS di e barco no ta funcionando, segun polis, pa mustra exactamente unda e ta situa, etc. E capitan anterior a informa esun existente pa e tene masha cuidao pasobra tin iregularidad tumando luga cu e barco, manera bay fuel ilegalmente na Venezuela pa despues drenta awa teritorial di Aruba pa haci comosifuera cu nos ta nan ultimo destinacion.
Polis despues a drenta den contacto cu e compania local Wevco pa un solucion. Mesora e compania a mustra interes pa representa e barco atrobe, pero cu mester paga adelanta. “Mirando cu ta diadomingo, a acorda cu asina siman habri lo paga Wevco pa por regla pa e capitan por bin tera pa regresa Republica Dominicana y pa manda un otro capitan abordo, cu lo mester hiba e barco bek pa e mesun destinacion”, polis ta informa.
