Un bon noticia pa habri fin di siman. E barco cu a sali for di Aruba rumbo pa parti noord di Guajira (Colombia) a wordo haya. E tabatin casi un siman perdi caba, pero coastguards di Colombia a descubri e barco Maria Esther, na 200 miya dilanti for di e costanan di Santa Marta, Colombia. E barco a perde tur sorto di comunicacion cu e tripulacion. Tabatin 8 persona abordo y aparentemente nan tur ta bon; pero sin cuminda.
Ainda autoridad maritimo di Colombia ta trahando riba nan rescate. Hopi esfuerzo a wordo haci den nos region pa localisa e barco carga cu mercancia cumpra na Aruba. Te hasta Centro di Rescate di Corsou a plama un mensahe di alerta, y tur barco den besindario a wordo poni na haltura pa asina tira un bista pa rescata sano y salbo e tripulacion di e barco Venezolano, Maria Esther. Finalmente e barco a wordo haya lo cual ta pone tentativamente un punto final y feliz na e noticia aki.
