Entre 15 pa 20 barco cu crudo liviano y otro tipo di componente ta para dilanti di e costa di Aruba, Corsou y e Peninsula Venezolano di Paraguana debi na e falta di pago di e compania petrolero PDVSA. E noticia aki a wordo publica pa “El Nuevo Heraldo” señalando cu segun fuentenan di e industria petrolero e situacion ey ta mustra e berdadero estado economico di PDVSA. “Nan tin un problema hopi grave, tin companianan cu tin hasta shete barco wardando. Tin barco cu tin 45 dianan. Otro, entre dos pa tres siman” asina ex gerente di PDVSA Horacio Medina a declara.
Algun di e barconan aki tin hasta 500 mil bari di crudo liviano. Otro barconan ta transporta MBTE y diferente componente necesario pa e elaboracion di gasolin, asina Medina, ken ta mantene contacto cu funcionarionan di PDVSA, a splica na medio di comunicacion Venezolano.
Segun medio di comunicacion internacional Reuters, un di e barconan ta propiedad di Maran Pythia, contrata pa Statoil, cu a carga crudo dia 19 di october ultimo na Angola y ta wardando riba teritorio maritimo di Corsou desde prome siman di november. Otro barco afecta ta “Los Angeles Spirit”, cu ainda ta para despues di yega na zona Caribense dia 15 di november ultimo.
E crudo liviano adkiri pa PDVSA ta wordo utilisa pa mescla cu e crudo pisa Venezolano pa obtene e densidad necesario prome cu e ta sali na benta pa exterior. Consecuentemente, e situacion aki lo por trece un fuerte impacto den e capacidad di PDVSA pa cumpli cu su clientenan. Segun Medina, esey lo por trece un problema hopi grandi pa cumpli cu e diferente compromisonan cu PDVSA tin cu paisnan manera China, Merca y incluso Cuba.
Segun Medina, ex gerente di PDVSA, e problema ta basicamente e falta di pago di PDVSA di pedidonan anterior. Pa e motibo ey, hopi proveedornan cu antes tabata dispuesto di duna un plaso di hasta 60 dia di pago awo ta exigi PDVSA un pago inmediato. Incluso segun Reuters, algun di e proveedornan mas grandi di e industria petrolero a cuminsa exigi PDVSA e pago adelanta,reduciendo e riesgo potencial teniendo na cuenta e problema di likides di e compania Venezolano.
Segun fuentenan consulta pa Reuters, PDVSA a aumenta su ofertanan den e mercado internacional e aña aki pa importa crudo y diluyente pa e produccion extra di petroleo pisa. Sinembargo, e pago na su proveedornan a tarda pa motibo di e caida di e prijs di petroleo. Algun di e proveedornan ta aceptando e intercambio di petroleo Venezolano como forma di pago. Esey lo duna PDVSA un tempo pa paga e crudo procedente di Africa Occidental. Segun Antonio de la Cruz, presidente di Inter America Trends, awo nan ta compronde e motibo di PDVSA pa cambia su proveedor di crudo liviano constantemente. E situacion aki no tabata un tema di calidad pero si pa motibo cu e proveedornan no tabata aceptando ningun tipo di relacion comercial cu PDSA pa falta di pago, asina De la Cruz a enfatisa.
