E barco Freewinds di e iglesia Scientologo, conoci den Caribe pa yuda cu cosnan comunitario, a ser nenga di drenta e waf di e isla di Saint Lucia, pa motibo di un caso di sarampi confirma.
Segun e periodista Dick Drayer a raporta, tin un total di 300 persona cu no por baha di e barco. Esaki a haci cu nan a tuma e decision di bay bek direccion Corsou, cual ta e base unda e barco semper ta para.
Tabata na final di april cu dokter a confirma e caso di sarampi cerca un persona procedente di Denemarken. E persona aki a biaha 17 di april for di Amsterdam pa Corsou y a bira malo despues cu el a yega. Gobierno di Corsou ta pidi tur persona cu tabata sea den of den cercania di e barco Freewinds, pa raporta nan mes na e departamento di salubridad publico, ya cu posibelmente nan lo por a ser contagia cu sarampi net prome cu e barco a bay Saint Lucia.
