Algun aña atras, tabata existi un linea directo entre Republica Dominicana y Aruba cu comerciantenan di nos isla no tabata probecha suficiente, loke a causa e ceramento di e linea.

Asina a duna di conoce Edward McCollum, ken ta responsabel comercial y vocero di e consulado general di Republica Dominicana. Tocante esaki el a splica cu tabata trata di un linea naviero Hulandes, na e momentonan ey frontera tabata habri y no tabatin e situacion di escasez di producto cu aworaki e isla ta sufri.

McCollum a expresa cu su persona cuater aña pasa a presenta un proyecto pa gobierno Dominicano pa habri bek e linea y busca e forma di exporta desde e isla dominicano pa Aruba, conhuntamente cu e consul di Corsou. Nan a logra cu e empresa Don Andres N.V di Corsou lo trece e prome barco cu fruta y berdura pa Aruba, dia 10 di februari aproximadamente.

Tambe a duna di conoce cu e barco cu lo yega na Aruba ta yama ‘Doña Luisa’ y tur hende lo por cuminsa cumpra frutanan y berduranan for di Republica Dominicana na un miho prijs. Tambe pa motibo cu e distancia entre e dos isla ta cortico e productonan ta mas fresco, specialmente na e momentonan aki cu fruta y berdura tin un costo halto den supermercado, segun McCollum a comenta.

Pa e motibo aki, e linea naviero a dicidi di opera e linea maritimo for di Republica Dominicana y tambe pa duna oportunidad pa area di construccion, alimento perecedero y no perecedero, tambe den area di plastico, productonan pa hardin, etc.

Tocante esaki, McCollum a bisa cu el a reuni cu diferente sector pa loke ta trata e tema di fruta y berdura, pa motibo cu hopi producto cu ta bin for di Merca y tin biaha for di Hulanda ta productonan cu a sali for di Republica Dominicana. “Pueblo di Aruba ta paga un cantidad grandi di costo di producto pasobra, prome ta sali for di RP, ta bay pa otro destino como Merca y despues nan ta manda pa Aruba”, el a sigura.

Ademas, el a menciona cu di e reunion aki cu diferente sector, tambe a reuni cu comerciantenan Chines pa asina nan por uni pa e importacion y nan mes por cuminsa importa nan productonan.

“No ta mes cos cumpra un producto cu ta costoso caba, pa otro producto cu tin un prijs rasonabel na supermercado”, McCollum a expresa.

Por ehempel, el a papia di awacati, cu biniendo for di RP no mester costa mas di 4 florin na un supermercado Chines. Di loke ta trata supermercado mas grandi e prijs ta mas halto.

Di mesun manera, el a afirma cu un linea di supermercado grandi di Aruba – cu e no por a bisa su nomber – proximamente lo move su operacionnan completo pa importacion di producto for di RP.

McCollum a informa cu tin un movemento na Aduana di 80 container cu ta bin for di Merca, Hulanda y Colombia. “Mi ta kere fielmente cu RD lo bay haci e diferencia, tin e posibilidad di ofrece producto di tur variedad cu un 30% menos di e costo cu otro paisnan”, el a declara.

Asina mes, McCollum a duna di conoce cu e barco aki lo cuminsa bin tur siman. E lo sali for di waf di Haina tur diabierna cu destino Aruba y lo yega diadomingo den oranan di anochi, pa desembarca e mercancia dialuna na prome ora di mainta.

Tocante e prijsnan, McCollum a specifica cu e ta kere cu Gobierno di Aruba mester contempla e posibilidad di crea un mecanismo di control di prijs. El a sigura cu nan como estado Dominicano ta oferta un producto a traves di su productornan pa exportacion y nan no por interferi cu e politica di comercio cu cada pais tin. Pero como un sugerencia, e comunidad y institucionnan mester pidi e mecanismo aki, pa motibo cu tin comerciantenan cu ta abusa di prijs di algun producto.

Di esaki, el a sigura cu comunidad tambe tin un parti di e culpa, pa motibo cu nan ta cumpra e producto cu e prijs halto. “Mientras esaki ta existi, no por bin un control pasobra no tin presion riba dje”, el a manifesta.

Asina mes, el a trece dilanti cu tin un canasta basico cu productonan controla, pero “loke mi no ta compronde ta con e fruta y berdura, cu no ta paga impuesto pa drenta Aruba, tin un prijs asina halto”, McCollum a comenta.

Pa finalisa, el a menciona cu esaki ta loke Gobierno Dominicano kier cu su persona lo haci, habri e mercado pa haya un mehora den prijs. Pero asina mes nan ta espera cu lo por mantene, pa motibo cu si comerciantenan bende na mesun prijs cu producto di Merca, esaki no lo tin sentido.