Zr. Ms. Holland entretanto ta ful swing cu e yudansa di emergencia na Haiti. E barco di patruya a sali dia 20 di augustus pa bay urgentemente e isla, cu a keda asota pa un teremoto. net prome cu esey, Marina den algun dia a sabi di kita mas cu 2.160 kilo di cocaina for di riba mercado.
Esaki a sucede durante un relacion di colaboracion guia pa Merca cu ta enfoca riba e lucha internacional contra droga. E captura di e contrabanda awe numa a keda publica.
Un di e intercepcionnan tabata posibel despues di un tip di Wardacosta Region Caribe. Esaki a descubri un ‘go-fast’ sospechoso. E helicopter maritimo di combate NH90, staciona a bordo di Zr.Ms. Holland, a nabega bay riba dje. Un francotirador di Infanteria di Marina consecuentemente a tira riba 3 motor di e boto y a derumbá esakinan. esey tabata necesario despues cu señalnan pa stop y e tironan no tabatin e efecto desea.
Unabes cu a logra stop e ‘go-fast’, un ekipo combina di Wardacosta Mericano y Cuerpo di Marina a subi bordo di e ‘go-fast’. E ekipo a saca e bultonan di droga cu a ser tira den lama for di awa. Tabata trata di mas cu 1.000 kilo di cocaina.
Mas droga
Despues di esaki Zr.Ms. Holland tabata envolvi den un captura di mas o menos 800 kilo di cocaina. E droga aki tambe tabata a bordo di un ‘go-fast’. Despues di un tip, Holland a nabega bay riba nan. E destacamento Legal di Estados Unidos a logra exito den e intercepcion aki y a confisca e cocaina.
Algun dia despues atrobe bingo! Un biaha mas e barco di Marina a involucra e helicopter di bordo pa obliga un ‘go-fast’ pa e stop. esey a logra despues di señalnan pa stop y tironan di advertencia. Un biaha mas a tira 360 kilo di cocaina den lama, cu despues a ser saca for di den lama. E sospechosonan despues a keda entrega den man di Wardacosta Mericano.
Tur e sospechosonan y e droga finalmente a keda entrega na Wardacosta Mericano pa persecucion na Estados Unidos. E 3 captura a keda haci den lapso di 1 siman. Tabatin un di 4 captura di 1.325 kilo di droga, pero esey a keda menciona anteriormente caba. E frecuencia di e cuater capturanan di droga den un siman mester keda cualifica como algo unico.
