(CaribbeanNewsNow) – Bridgetown, Barbados – Lo inimaginabel a sucede, cu un di e destinacionnan mas popular di Caribe, y den temporada halto di turismo, a topa cu un problema mayor. 2018 a cuminsa cu un escape di awa sushi, cu e Barbados Water Authority (BWA) a yama un crisis cu ta filtrando den partinan di e popular costa sur di e isla.

E incidente a causa un serie di problema caba na e pais: residentenan cu mester a move pa areanan mas habitabel, hopi negoshi na e costa sur mester a cera, bishitantenan di e isla a keha tocante peligro di keda contagia cu gastroenteritis, y e destinacion popular cerca turista a soporta comentarionan negativo riba websitenan di biahe.

Expertonan di Trinidad & Tobago ta asistiendo BWA den nan esfuerso pa resolve e problema; sin embargo Patricia Inniss, hefe di e division di awa di desperdicio di BWA, tabata hopi cla advertiendo cu cada turista, empresario, y doño di hogar mester hunga un papel den haya un solucion.

El a añadi cu “Nos ta apela na tur hende, no solamente residente pero na casnan comercial mayor, hotel y guest housenan grandi, nos no ta bay identifica ningun hende specificamente na e momento aki, pasobra nos no sa exactamente kennan ta e contribuidornan mas grandi na e problema.”

E incidente actual ta trece na mente e blokeo den pasado di e sistema di riool causa pa desperdicio inapropia, causando daño na pompnan y ekipo di filtracion. Inniss a haci un apelacion na habitantenan di Barbados cu no ta deshaci na un manera apropia di nan desperdicio y a ofrece ayudo di su organisacion pa educa nan.

Pero accion no a yega lihe bastante pa cierto paisnan. Canada, Merca, y Reino Uni a pone advertencia di biahe avisando nan ciudadanonan tocante e riesgo di biaha pa Barbados.

Henter e problema a bira pio pa e hecho cu cierto expertonan tabata mira e cos aki ta bin caba. Na januari 2017 funcionarionan anonimo di BWA a bisa e medio Barbados Today cu e sistema di desperdicio di e pais tabata na punto di collapse. E mesun funcionarionan aki di BWA a confirma tambe alegacionnan haci pa Mia Mottley, lider di oposicion di e isla, cu gobierno a nenga oferta pa financia e rehabilitacion di ekipo daña y e construccion di un sistema adecua di desperdicio pa e costa west.

Pa loke ta e costa sur, cu ta e luga di e actual leak, e fuente a bisa, “ Con bo por ta trahando hotel na e costa ey y na Bridgetown, si e plantanan di maneha desperdicio di henter Bridgetown y costa sur ta anticua y na werki? E plantanan aki mester di atencion urgente.”

E falta di atencion aki a haci e controversia bira un bala di futbol politico, cu lider di oposicion Mottley primintiendo cu su gobierno lo resolve e crisis di awa sushi si nan gana eleccion e aña aki, y ministro di Comercio, Industria y Desaroyo di Negoshi Chikito, Donville Inniss, defendiendo su gobierno, mientras cu the poop literally hit the fan of en todo caso e pavimento. El a desmenti tambe cu su gobierno di Democratic Labour Party (DLP) tabata sa di e problema y a ignora esaki.