Hospital tin suficiente espacio pa atende pacient, asina vocero di Dr. Horacio Oduber Hospital Charlene Huntington a bisa Bon Dia Aruba.
E cantidad di hospitalisacion di persona cu Covid-19 ta aumentando poco poco. Sinembargo esey no ta nifica cu a yega na e capacidad maximo. Pero esey no ta kita cu tabatin informacion ta core rond ayera, cu Dr. Horacio Oduber Hospital no ta acepta mas pacient.
Tabatin dos caso separa, di dos famia cu no tin relacion cu otro, cu a bisa cu nan a hiba nan familiar pa hospital y ambos a tende cu no por tuma mas pacient pasobra ‘hospital ta yen.’
Sinembargo, e relato di e dos famianan aki no ta cuadra, segun Huntington. “Tin lugar riba e afdeling Covid y tambe riba e otro pisonan.”
Hospital ta sigui protocolnan estricto prome cu haci cualkier test, of pa admiti un persona pa tratamento of operacion, e vocero di hospital a agrega.
