Cuerpo regulado di telecomunicacion di Bangladesh a pidi operadonan di servicio di celular pa stop servicio den camponan den sur oriente, unda centenares di miles di refugiadonan Rohingya for di Myanmar ta biba, citando menasa di siguridad y uzo ilegal di telefon, un oficial a bisa ayera.
Zakir Hossain Khan, vocero pa e Comision Regulado di Telecomunicacion di Bangladesh, a bisa cu a pidi e operadonan cumpli cu e orden dentro di shete dia. “E decision a ser tuma pa motibo di siguridad nacional”, el a bisa.
Contestando ki sorto di menasa e pais ta enfrentando, Khan a bisa cu un encuesta recien den e camponan a revela cu ta uza celular di forma ilegal. El a bisa cu tin reporte cu tin hende presente cu ta un menasa pa siguridad nacional, sin elabora.
Te ora cu servicio di celular stop, a pidi operadonan pa suspende servicio di data y internet entre 5pm y 5am tur dia den e camponan na districto di Cox’s Bazar, nificando cu por haci unicamente yamadanan basico, Kahn a bisa. Ademas, a pidi pa sigura cu señal di operador di Bangladesh no por wordo ricibi na Myanmar.
Khan a bisa cu ta obvio cu ta kibrando ley pasobra niun persona ta permiti di haya un SIM card sin un tarheta di identidad local of paspoort, cual mayoria di refugiado no tin. Un Bangladeshi mag di registra pa un maximo di 15 conexion mobil.
E decision a causa preocupacion cerca e refugiadonan, kende lo keda sin conexion cu nan familiarnan na Myanmar. Algun refugiado a bisa cu a haya e SIM card for di ciudadano Bangladeshi cu a registra celular na nan nomber y bende nan esaki.
Mas di 700,000 Rohingya a huy un accion na Myanmar dos aña pasa y ta kedando den campo di refugiado na Bangladesh.
