Aaron Arenas tabata e hoben selecciona pa representa e contingente di Scouting Aruba na e ceremonia di apertura di e di 24 World Scout Jamboree.
Aruba ta participando cu un delegacion di 34 hoben y lider Scout na e evento cu ta reuni 40 mil persona di 150 pais. Durante e proximo dos siman e hobennan local lo ta participando na diferente actividad, entrenamento y obra comunitario na Bethel Reserve na West Virginia. Esaki ta un experiencia cu e delegacion, esun di mas grandi den historia di Aruba su participacion na e evento aki, a bin ta traha riba dje y prepara p’e durante ultimo dos aña.
E hoben Arenas ta un Explorer miembro di Grupo Scout Ora Ubao. Na e ceremonia di apertura di e World Scout Jamboree tabatin presencia di e Bear Grylls, e celebridad cu varios programa na Discovery Channel.
