Corantnan ABC y Ultima Hora a informa cu e criminalnan cu a participa den un asalto miyonario na un empresa di transporte di placa na Paraguay, a huy pa Brasil den dos boto, cu a ser haya pa polis federal di Brasil, na lago Itaipu, zona conoci como Itaipulandia, na 70 kilometer di Foz.
Un polis a muri den e asalto cu explosivo na sede di un compania di seguridad priva Prosegur na Ciudad del Este na Paraguay. E crimen a ser cometi pa mas di 50 miembro di un banda criminal di Brasil, conoci como “Primer Comando Capital” (PCC), autoridadnan a informa.
Polis di Paraguay a informa cu entre 50 y 60 miembro di e grupo PCC, cu hopi arma di candela a tira riba hendenan, lagando 1 polis morto y 3 hende civil herida durante e asalto cu a tuma lugar diadomingo marduga na Ciudad del Este, cu ta di dos ciudad mas grandi di Paraguay y na frontera cu Brasil. E polis cu a muri tabata un suboficial di grupo special di operacion di polis di Paraguay. E grupo di hende civil cu a keda herida ta den recuperacion y actualmente for di peligro.
E grupo di criminal a usa mas di 12 auto den e asalto, un di nan tabata un truck cu nan a usa pa hiba elemento di apoyo, manera hombernan y explosivo. Despues di e atake e criminalnan a huy for di Paraguay, y nan a bandona tur auto na ciudad di Hernandarias. E criminalnan a kima 19 auto particular, entre nan varios di Prosegur, un firma di Spaña cu ta transporta placa. Cu e accion aki anto criminalnan a logra defende nan mes di polis cu a bay na sede di e empresa pa purba evita e asalto miyonario. Polis nacional no a confirma e cantidad di placa cu nan a horta, aunke diferente medio di comunicacion di Ciudad del Este ta pensa cu nan a horta entre 20 y 40 miyon dollar.
E empresa Prosegur no a duna ningun opinion ainda y nan miembro di directiva a bisa cu nan lo duna un comunicado den proximo oranan. Polis no a confirma si e criminalnan a usa explosivo plastico, di fabricacion industrial C4 pa asina drenta den boveda di e empresa, manera algun medio di comunicacion a splica. Pero efectivo militar di Paraguay a confirma cu e criminalnan a usa explosivo di potencia halto, hunto cu granat di man y arma di candela manera fusil antiaereo. Lorenzo Lezcano, ministro di interior a bay ayera na Ciudad del Este y eynan el a bisa periodistanan cu “e operativo di e criminalnan tabata bon planea, pasobra e criminalnan tabatin explosivo.” Lezcano a splica cu forsanan di seguridad ta traha den coordinacion cu polis federal di Brasil, pa asina por detene e criminalnan aki.
Justo Zacarias, gobernador di departamento di Alto Parana, a bisa na radio di Brasil cu despues di mey anochi, el a scucha hopi boroto cu explosion y despues hopi tiro te den oranan di marduga. Autoridad local a dicidi di suspende les pa mucha di scol na Ciudad del Este.
