Aruba a ricibi un ayudo di 42.8 miyon florin for di Hulanda. Ya caba e suma aki ta den caha di Gobierno di Aruba, asina minister di Finansa y asunto Economico, Xiomara Maduro a yega di anuncia.
E ayudo financiero aki den forma di prestamo y sin interes a keda concretisa oficialmente den reunion di conseho di minister di Reino cu a tuma luga diahuebs ultimo.
Minister Maduro a bisa cu ya e fondo di 42.8 miyon pa atende cu e crisis produci pa e pandemia di coronavirus/Covid-19, a wordo transpasa pa pais Aruba. El a wordo ricibi como yudansa den prome instante.
El a clarifica cu e yudansa aki y tur otronan no ta un donacion sino fiansanan. “Es decir e no ta un placa por nada, e ta un fiansa,” el a bisa. E fiansa ta na cero porshento y pa dos aña, caminda Aruba mester paga e suma aki bek. Esaki conforme conseho di e colegio di supervision financiero (CAft). Unabes cu e tempo lo yega, gobierno lo evalua si mester refinancia e sosten financiero aki.
Logicamente tur e colaboracion financiero aki ta bao cierto condicionnan. Aruba ta conta cu e facilidad aki manera Corsou y St. Maarten. E mandatario a bisa cu e tipo di ayudo aki lo keda asina tanten cu Hulanda por sigui presta na cero porshento tambe. Pero na e momentonan aki, nan ta keda pendiente di haya mas claridad riba e yudansa cu Hulanda lo sigui brinda nos pais.
Fondo internacional y local
Riba e parti financiero, banda di e colaboracion di Hulanda, gobierno ta buscando fondo for di mercado internacional pa sigui atende cu e crisis aki durante e proximo tres luna.
Pero e mandatario a informa cu ainda gobierno no ta cla pa logra e fondo aki. E echo cu diahuebs ultimo e compania di evaluacion Fitch Ratings a downgrade Aruba, minister Maduro a considera esaki como un ‘sla’ cu ta dificulta e proceso di por haya fiansa.
Apesar di e rating desfaborabel di BB outlook negativo, e mandatario a bisa cu te ainda ‘nos ta den contienda’ pa busca e fondo necesario for di mercado internacional. Si na dado caso cu Aruba no por tin acceso na e fiansa aki, minister a indica cu nos ta destina na Hulanda pa por haya e fondo aki.
Igualmente nan ta purbando riba mercado local pa por yega na fondonan necesario pa maneho di gobernacion. Pero tambe pa por brinda e prome alivio necesario pa esnan cu a perde trabao
Nan ta haciendo esaki hunto cu Banco Central cu ta trahando riba e tereno aki di un manera balansa. El a bisa cu e echo cu nos por presta for di mercado internacional ta yuda nos den e reserva di divisa, mientras cu presta local ta dificultad esaki.
