Un tema cu pa basta tempo tin reclamo riba dje y tur dia esaki ta birando mas. E percepcion cu tin riba nos isla ta cu banconan no ta tuma accion contra negoshinan cu ta obliga bo swipe mas cu diez florin no obstante e cantidad di keho cu tin riba esaki. E kehonan a bira mas visibel danki na medionan social manera Facebook, unda un y tur por vocifera nan mal contento y laga esaki yega na un grupo grandi di ciudadano.
Por a nota cu e keho mas grandi ta den direccion di locual ta ser yama ‘supermercadonan Chines’, aunke no por descarta cu tin mas lugarnan manera entre otro botica y fast foods restaurants cu tambe ta exigi pa e compra surpasa e montante di diez florin. Pa hopi hende esaki ta un abuso ya cu segunnan e ta forsa un hende gasta mas di locual e kier.
Costo di negoshi
Riba Facebook a keda publica diferente potret particularmente di un di e cuater banconan comercial, Caribbean Mercantile Bank (CMB) unda nan ta declara tanto publicamente como den mensahenan priva: “Den e contract cu negoshinan ta firma, ta indica cu mester procesa tur pago electronico sin importa e suma.”
Segun algun comerciante cu Bon Dia Aruba a combersa cune, nan ta mustra cu pa banco ta fasil pa papia di swipe tur suma pero nan mes no ta tene comprension cu e gastonan mara na esaki. Den un contract cu nos a logra tira bista riba dje, ta papia di un huur mensual pa e machine y un transaction fee di 3.6% pa cada transaccion. Di un comerciante nos a comprende cu cada biaha cu e machine yama pa conecta cu banco e ta coste 35 cent. Na mes momento Bon Dia Aruba a comprende cu basta comerciante awor a opta pa haci e coneccion via internet pa asina mantene e costo mas controla.
Seguridad
Recientemente den Parlamento di Aruba a discuti riba e tema di seguridad unda e keda presenta cu e fenomeno di atraco ta alarmante riba nos isla. Cu esaki ta trece cune e situacion cu personan ta opta pa no cana cu placa efectivo (of menos posibel) mas y ta prefera di swipe. E combinacion di e situacion actual pa loke ta swiping y seguridad, ta forsa bo pa sea gasta di locual bo kier of pa toch cana cu placa cash.
Dialuna awor Bon Dia Aruba lo tuma contacto cu Asociacion di Banconan, ATIA y departamento di consumidor riba e tema aki cu ta birando un frustracion pa nos pueblo.
