Na nivel internacional nos ta mirando cada biaha mas interes pa tecnologia di Blockchain y Bitcoin riba tereno financiero, tanto como tereno di cuido. RBC por ehempel a cuminsa experimenta cu esaki ya caba. Andrew Rasmijn ta duna un ehempel con un compania ta purba trece innovacion cu e tecnologia pa pashentnan.
Manera ta conoci ya caba na nivel internacional, algun banconan ta cuminsando pa wak e potencial di e tecnologia Blockchain y tambe Bitcoin. No tur banco y tambe gobiernonan ta wak e mescos. Nos por mira por ehempel cu gobierno di China a prohibi Initial Coin Offerings (ICOs) di cualkier cripto placa den nan pais.
ICO ta un practica den mundo di cripto placa unda ta distribui e prome monedanan virtual entre esunnan cu ta inverti den e creacion di e cripto placa y esunnan cu tin interes pa sostene un cripto placa nobo. Asina esunnan cu ta crea e monedanan virtual ta purba haya placa bek pa e trabou cu nan a haci pa crea e moneda virtual. Sinembargo tin chens cu esunnan cu ta bay inverti den esaki lo uz’e pa maldad manera labamento di placa.
RBC na Canada ta experimenta cu cripto placa
Pero tambe mester subraya cu banconan rond mundo ta mirando posibilidadnan pa inverti y experimenta cu tecnologia di cripto placa y Blockchain. Un di e banconan aki ta Royal Bank of Canada (RBC), cual tin un filial na Aruba mes. Segun fuente CoinDesk, ya caba un aña pasa e banco a oficialmente declara cu nan ta colaborando cu Ripple, un compania cu ta tras di e cripto placa cu e mesun nomber.
Esaki a bin despues di hopi dificultad pa convence ehecutivonan na nivel halto di e compania pa experimenta cu e tecnologia. Sinembargo despues di ‘simplifica mucho e concepto y tambe bay den mucho detaye tecnico’, un ekipo den e compania a logra convence esunnan na mando pa innova mas den espacio bancario. Vocero di RBC pa carchi, pago y digital Linda Mantia a expresa cu e sintimento den RBC y den industria bancario en general pa e tecnologia di Blockchain ta cu ‘nos ta kere Blockchain ta un tipo di internet financiero, cual su potencial total no ta conoci ainda’.
Dicon e banco RBC na Aruba no ta purbando di ehecuta algun di e experimentonan tumando luga den e organisacion no ta conoci ainda. Pa esaki nos lo tuma contacto cu RBC y informa riba un edicion proximo loke nan tin di bisa riba e topico.
Beneficionan di blockchain den bida diario
Bon Dia a acerca Andrew Rasmijn, kende ta un persona entusiasma pa e potencial di e tecnologia aki. Segun sr. Rasmijn, el a bay New York pa un conferencia unda e director di un banco na Canada a splica con e compania ta purbando innova den espacio bancario. “Nan ta link e carchi di visa di nan clientenan cu nan telefon, e-mail y tur cos. Tur e informacion aki ta bay den e Blockchain”.
E blockchain ta percura pa tur informacion wordo warda di manera sigur y tambe pa e informacion ta conecta. Esaki segun sr. Rasmijn por evita cu problemanan cu banco tarda hopi pa resolve. “Ora bo yama un receptionista e persona lo por wak ya caba ken ta yamando, kico mas o menos lo por ta pasando cu su cuenta of carchi y por traha mas eficientemente pa resolve e problema”.
Esaki segun sr. Rasmijn ta solamente un ehempel chikito cu banco y cliente por mira di beneficia di dje riba base diario.
Avance den tecnologia
E Blockchain, cual simplemente ta e tecnologia cu Bitcoin ta uza como su protocol, ta percura pa informacion wordo valida y manda di manera sigur di un luga pa otro. Esaki tur ta wordo ehecuta pa computernan, cual segun sr. Rasmijn ta percura pa tin e cantidad minimo di eror y emocion envolvi cu e proceso.
“No ta por nada cu Aruba Bank awo ta cuminsa pa bay den direccion di Smart Deposit Machines. Tur cos ta bayendo den direccion di tecnologia. Bitcoin actualmente ta e tecnologia mas sofistica cu ta haci e proceso di manda y ricibi placa na nivel internacional mas facil y automatico, pa medio di computernan”.
Un di e rasonnan cu tin un gran interes pa Bitcoin y otro monedanan virtual ta cu e tarifanan pa manda placa di un luga pa otro, sin distincion di con leu of na ki pais e placa ta bay, ta hopi abou. E rason cu esaki por ta asina abou ta pasobra e proceso ta cana automaticamente. Ora di manda un pago riba e network di Bitcoin, e pago ta wordo anuncia riba e Blockchain. Despues di esaki un grupo di computer riba e network lo percura pa e transaccion wordo firma y verifica. Al contrario e banconan ta uza un intermediario cu ta un compania, manera Visa of Maestro pa verifica transaccionnan. “Pero ora bo ta uza un tercer partido, e ta bin cu tarifa halto y tambe tardansa”.
Sinembargo e manera di traha aki ta bin cu su puntonan positivo y negativo. “E ta berdad cu ora algo wordo regula bo ta core menos riesgo y tin hende cu ta responsabel pe. Pero e realidad ta cu hende ta haci eror. Tin biaha hende por haci algo malo tambe. Pues hende nunca lo haci cosnan manera un computer ta hacie, pasobra e computer no tin ningun sintimento y ta completamente obhetivo”.
Aplicacion pa industria di cuido
No solamente riba tereno financiero y bancario e tecnologia aki por tin un uzo. Tambe tin companianan cu ta trahando pa implementa e tecnologia di Blockchain den industria di cuido y medicina. Un di nan ta Patientory, cual tin como meta pa conecta henter e cadena di cuido: dokter, pashent y organisacionnan manera AZV, botica y fundacionnan.
E compania ta uza e tecnologia di Blockchain pa sigura e informacion di pashent y percura pa tur e informacion wordo interconecta entre diferente organisacionnan pa asina haci e calidad di servicio mas halto.
“Esaki ta un ehempel realistico con e tecnologia aki por wordo aplica. Cu e sistema aki tur e organisacionnan tin e informacion y henter historia di un pashent actualisa. Pa Aruba esaki por kiermen cu un dokter por sa cu por ehempel e pashent a kibra su pia den 2015, el a haya longkanker 5 aña pasa etc., pues esaki ta pa ora tin cu comunica cu otro instancia nan por comunica mas eficientemente”.
