(NLTimes)— Cuminsando otro aña, tur donante di sanger lo ricibi e mesun encuesta pa yena pa determina si nan sanger of plasma ta safe pa uza. Banconan di sanger no lo diferencia entre donantenan homosexual, heterosexual of di cualkier otro sexualidad, segun Sanquin, cual ta e fundacion responsabel pa provee sanger safe na Hulanda.
Comportacion sexual lo keda un factor ora ta considera e riesgo di infeccion transmiti via sanger. Actualmente, hende homber cu tin relacion sexual cu otro hende homber por ta donante solamente si nan ta den un relacion monogamo pa basta tempo of si nan no a tene relacion sexual pa 4 luna prome cu duna sanger. E regla aki no ta aplica pa hendenan heterosexual.
Pero e politica dirigi pa hende homber homosexual mester caba, segun Sanquin. E partnernan sexual di un donante no mester importa mas. Minister di Salud Ernst Kuipers a bisa den un carta pa Tweede Kamer cu e decision aki ta bon noticia. Tambe el a bisa cu ta extremamente importante cu e standard nobo tuma efecto na 1 di januari lo mas tarda.
E implementacion ainda mester tempo, segun Sanquin. E organisacion ta traha hunto cu Prothya Biosolutions Netherlands BV, cual ta produci medicina for di e plasma di sanger colecta. Pa via di e evaluacion nobo di comportacion sexual, Prothya lo mester ahusta su dossier di registracion cu e Agencia di Medicina Europeo (EMA). Despues cu esaki wordo aproba pa EMA, nan por introduci tratamento igual pa tur donante di sanger, Prothya a declara.
Banconan di sanger tambe lo mester haci ahustacionnan y train tur empleado.
Gruponan di interes, incluyendo e abogacia di derecho homosexual COC a bisa cu nan ta “contento” cu e desaroyonan. “Cuminsando 2024, hende homber homosexual no lo wordo discrimina mas ora nan duna sanger,” e organisacion a conclui. Esaki a bringa pa e desaroyo aki pa hopi aña caba, segun presidente di COC, Astrid Oosenbrug, ken ta yama e situacion un stap pa dilanti.
Politiconan y opinionnan publico no tabata di acuerdo caba cu e politica di discriminacion contra donantenan masculino homosexual, pero e organisacion cu ta supervisa transfusionnan di sanger a cita nan preocupacion tocante seguridad. Sanquin a desaroya e politica nobo aki a base di investigacion cientifico, “cual ta provee hermentnan concreto pa implementa e cambio aki.” E cambio tabata den consideracion pa basta tempo caba, pero investigacion en colaboracion cu Universidad di Maastricht tabatin retraso.
Aunke e NVHP—e asociacion Hulandes di pashent haemophilia—a bisa cu nan ta na fabor di un politica mas liber, e no ta convenci cu esaki por wordo implementa completamente safe. P’esey e asociacion di pashent cu malesanan coagulacion kier un supervisor of inspector independiente. “Nos ta mira esaki como e responsabilidad di e minister pa crea un supervision externo den seguridad di sanger,” president di NVHP, Arnoud Plat, a bisa. “Productonan di sanger mester ta completamente safe.”
