Por lo menos un banco comercial a haci anuncio publico cu no ta acepta placa cash na momento di haci deposito riba credit card. Caribbean Mercantile Bank N.V. (CMB) a haci esaki ayera riba nan pagina di Facebook.
E reaccion di clientenan di CMB no tabata hopi positivo riba e decision aki di e banco. Sinembargo, diferente otro ciudadano a duna di conoce cu otro banconan comercial di unda cu nan ta cliente, ya a haci e cambio aki pa sea un of mas aña atras caba.
Segun e comunicado ta bisa, e motibo cu nan ta stop di tuma placa cash ora di deposita riba credit card, ta ‘pa asina cumpli cu regla- y regulacionnan cu ta percura pa un atmosfera bancario mas sigur pa tur hende’. Aunke no por haci e deposito mas den efectivo, e banco ta splica den su comunicado cu por uza e cuenta coriente pa deposita si bo ta cliente. Den caso cu bo no ta cliente (mas) di CMB pero si ta doño di un credit card cerca nan, bo lo tin cu haci e transferencia for di e banco na unda bo tin un cuenta coriente, e comunicado di CMB ta splica.
Entre e argumentonan treci dilanti door di diferente ciudadano pa e cambio aki, ta bin e punto cu e cliente lo sali perdi si e bay cu dollar cash, ya cu lo mester bende banco e na un tarifa mas abou y cumpr’e bek na un tarifa mas halto for di banco mes pa por deposita riba e tarheta di credito. Un otro ciudadano ta splica cu na e manera aki bo ta wordo forsa pa paga un deposit fee. Si e ultimo aki ta e caso di CMB specificamente, no ta conoci pa nos redaccion pero si nos ta na altura di banconan cu sa cobra un montante pa deposita placa riba bo cuenta.
Durante dia di awe Bon Dia Aruba lo ta tumando contacto cu entre otro CMB como tambe cu e asociacion di banco pa asina haya mas informacion di e motibo pa kico a stop di tuma placa cash pa deposita riba tarhetanan di credito.
