banco nobo (sh) (2).jpg

CIBC FirstCaribbean International Bank a habri porta di su prome sucursal ayera na Tanki Flip (ex oficina Doov).

 

Director local Giovanni Atencio ta splica cu nan ta kere ainda tin suficiente espacio na Aruba cu awor tin 4 banco, pa haya mercado y asina ta factibel pa nan habri un localidad. E banco tabata operando caba na Aruba sinembargo specialmente pa clientenan grandi, consorcio (consortium) cu companianan grandi invertiendo den proyectonan grandi. Manera e proyectonan di molina di biento na Vader Piet y Urirama.

 

Awor e banco ta subi e mercado di clientenan ‘chikito’ y Sr. Atencio ta bisa cu cada cliente cu lo adkiri ta un cliente special pa nan. “Nos kier un relacion cu nos clientenan duradero y cu ta enfoca riba nan necesidad.”

 

CIBC cu ta un compania internacional, originalmente di Canada, ta indica cu nan ta mira bon perspectiva pe economia na Aruba como motibo principal pa habri e sucursal. E reapertura di e refineria siguramente ta algo cu nan tin den bista, sinembargo Sr. Atencio ta bisa cu e plan sin of cu e reapertura tabata pa habri e localidad. E motibo di crecemento economico cu e banco nobo ta premirando, ta algo sorprendente mirando cu Banco Central di Aruba recientemente a ahusta su pronostico abou.

 

“Nos ta mira cu tin espacio pa crece. Servicio ta algo hopi importante pa nos y a base di investigacion nos a tende cu tin necesidad pa esaki ainda. Hende kier algo otro tambe”, asina Sr. Atencio ta comenta.

 

Costo di banco y interes

Nos a puntra di e banco nobo tambe ta bay competi riba e aspecto di costonan bancario y tambe interes. E director ta bisa cu siguramente nan ta bin cu un campaña cu un interes atractivo. Kico e no por divulga ainda. Si e competencia aki tambe lo bay tin su efecto structural riba e tarifa interes, ta algo cu tempo nos isla lo haya contesta. Tambe si e banco lo competi riba e otro costonan. Segun e director nan maneho ta cu nan operacion mester ta mas eficiente posibel. P’esey mas y mas lo bay ta automatisa pasobra e gastonan mas halto di e banco ( y tambe otro banconan) ta e gastonan personal.

 

Bon Dia Aruba lo sigui mañan riba e efectonan di mas competencia probabel lo tin riba e mercado bancario.