Banco Mundial y Fondo Monetario Internacional (IMF) a confirma un mehoracion den e paisnan Latinoamericano y di Caribe, cu excepcion di Venezuela y Trinidad & Tobago, y ta calcula cu e region lo crece e aña alrededor di 1,2 %, cifra cu Banco Interamericano di Desaroyo (BID) a eleva na 1,5 %.

Brasil y Centroamerica a duna un empuhe na 2017 na economia Latinoamericano y ta anticipa cu pa 2018 e region lo alcansa “velocidad di crucero” apesar di e dudanan cu e aña electoral crucial ta genera na Venezuela, cu ta terminando su di cuatro aña den recesion.

E avance a tuma lugar den un ambiente di reactivacion mundial, especialmente di Merca y China, principal cumprador di materia prima Latinoamericano, y di e recuperacion spera den prijs di materia prima, incluyendo esun di petroleo. Na e banda opuesto tin Ecuador, Venezuela y Trinidad & Tobago, e dos ultimonan den di cuatro aña di recesion.

Ta anticipa cu Venezuela, lo mira su economia sigui reduci cu mas di 10 % e aña aki y 6 % den e proximo, den cuadro di e empeoramento di e crisis politico y humanitario y di un inflacion di 652,7 %.

“E situacion di Venezuela ta hopi complica. Ta hopi dificil predeci pasobra tin hopi factor fuera di economia,: e economista José Juan Ruiz, hefe di BID a declara, resaltando cu e caso di Ecuador ta “hopi diferente.”

Latinoamerica ta crece

“Lo mas destacable ta cu, despues di dos aña di contraccion, America Latino a bolbe crece. No tanto: entre 1,5 % y 1,7 %, pero esey ta miho cu loke tabata spera,” Ruiz a bisa, cu ta mira posible alcansa “velocidad di crucero” na 2018.

Despues di un contraccion di 0,9 % na 2016, a logra un impulso por medio di e recuperacion di Brasil y Argentina y e fortalesa di Centroamerica, cu lo crece alrededor di 3,8 % e aña aki, casi tres biaha e promedio regional.

Latinoamerica tin “un realidad heterogeneo,” segun Ruiz, “pero loke ta splica e crecimento ta cu e paisnan den crisi na 2016 tabata siete y actualmente e dosnan mas importante a logra progresa: Brasil y Argentina,” cu un crecimento e aña di 0,7 % y 2,5 %, respectivamente.

Segun e organismonan menciona, Argentina a haya apoyo di e demanda interno, e caida di e inflacion y inversion mayor den infrastructura.

Mientras cu na Brasil, despues di “ocho trimester di caida consecutivo, crecimento finalmente a bolbe”, aunke confiansa ta keda sensible pa e situacion politico.

E incertidumbre politico lo ta e denominador comun na 2018, unda varios pais ta celebra eleccion, entre nan Brasil, Colombia, Mexico y Paraguay, na cual por suma e cambio di gobierno na Chile na maart.

“E proximo aña 80 % di e poblacion Latinoamericano ta elegi gobierno nobo y den e contexto ey e inversionistanan ta cauteloso,” Giorgio Trettenero, secretario general di e Federacion Latinoamericano di Banco (Felaban) ta bisa, alertando encuanto “discursonan populista” cu ta menasa e ekilibrio fiscal y comercial.

Trettenero a subraya e caso di Mexico, cu lo tin eleccion presidencial y legislativo na juli y unda e aña aki y e proximo ta spera crecimento di 2 %, mey mey di inkietud pa e negociacion di e Tratado di Libre Comercio di America del Norte y e impacto di e reforma y licitacionnan den e sector energetico.

Den e contexto ey, Mexico, Chile, Peru y Colombia ta esunnan cu ta mustra mas oportunidad pa inversion, segun Liliana Espinosa, lider di Fusion y Adquisicion pa America Latino di e firma global Baker McKenzie.

Ta calcula cu Chile lo crece cu 1,4 % e aña aki y 2,5 % na 2018, por medio di un aumento fuerte di prijs di koper; mientras Colombia lo avansa 1,7 % y 2,8, respectivamente, cu e impulso di inversionnan cu a resulta despues di e acuerdo di paz cu FARC.

Peru ta sigui mas halto cu e promedio regional, Trettenero ta indica, cu un aumento di 2,7 % e aña aki, apesar di e perdidanan causa pa e inundacionnan.

Den mesun linea, segun IMF, ta move Bolivia (cu 4,2 % na 2017 y 4 % na 2018) y Paraguay (3,9 % y 4 %), e dos paisnan cu mayor crecimento di Suramerica, y Uruguay (3,5 % y 3,1 %), anima pa e demanda interno y expansion di credito.

Despues di contrae cu 1,5 % na 2016, ta premira cu economia Ecuatoriano lo avansa 0,2 % e aña aki, despues di e reformanan introduci pa e gobierno nobo pa enfrenta e reduccion di prijs di petroleo, e efectonan di e teremoto di 2016 y e apreciacion di dollar.