America Latino por saca probecho di un eventual conflicto comercial entre Estadonan Uni y China; sin embargo, Venezuela ta e unico pais cu no lo crece economicamente, segun vice-presidente di Banco Mundial pa America Latino y Caribe, Jorge Familiar.

Familiar a afirma cu e perspectiva di crecemento economico cu Banco Mundial pa America Latino y Caribe ta anticipa ta alrededor di 2,6 % pa e aña aki y 2,7 % pa e proximo, den ambos caso sin considera Venezuela, cu ta pasando den un severo crisis economico y politico.

“Salvo Venezuela, tur e paisnan ta creciendo e aña aki; e crecemento ta concentra alrededor di e media regional di 2 porciento. Nos tin algun cu ta crece cu tasa mas halto cu esaki y ta destaca Panama, Republica Dominicana y Nicaragua,” sr. Familiar a manifesta.

El a declara, den cuadro di un Cumbre Empresarial, cu e entidad lo cera su aña fiscal na juli cu credito di 4.000 miyon dollar pa e region, e mayoria pa financia obra di infrastructura.
“Un conflicto comercial entre dos mercado hopi grandi, cu ta destino di exportacion Latino Americano, por genera algun beneficio a corto plaso di suministra importacion na determinando niche nan; pero a mediano y largo plaso e guera comercial no ta beneficia nos region,” e ehecutivo a splica.

China, voraz consumidor di materia prima, a converti den e principal socio comercial di America Latino y e presencia di empresanan grandi di e pais aki den e region a crece den ultimo añanan, mientras cu Estadonan Uni ta perdiendo protagonismo.
“Loke a beneficia nos region di manera importante ta cu tin un sistema internacional di comercio cu regla cla, cu ta stabiel tambe. Si no tin esey, anto tin volatibilidad y incertidumbre,” sr. Familiar a afirma.

Pa loke ta financiamento cu ta brinda na e region, e ehecutivo a bisa cu pa e proximo ehercicio fiscal 2018-2019 e banco ta spera di supera e 4.000 miyon dollar na credito, di cual como 60% ta pa infrastructura.

“Esaki tabata un aña di actividad relativamente abao pa nos, pa e procesonan electoral den curso na varios pais. Nos volumen normal ta entre 6.000 y 8.000 miyon dollar. Lo fundamental ta cu e inversion cu ta bin di capital di Banco Mundial ta mobilisa recurso di e sector priva,” el a agrega.

(fuente: Reuters)