Algun banco na Aruba no ta tuma pago si no tin cuenta cu nan. Esaki ta pone cu algun persona, sin importa e motibo pa locual no tin banco, tin cu saca cuenta pa asina por haci nan pago sin cu banco nenga nan.

Un señora mayor di edad a acerca Bon Dia Aruba. E señora ta bisa cu actualmente e no tin trabou y no tin cuenta di banco, pa motibo cu nan a cera su cuenta ora el a stop di hinca placa aden. Su casa si tin cuenta, pero e no ta keda stroba su trabou pa asina keda haci pago.

E señora ta splica cu el a bay banco na Noord, unda e trahado di banco a nenga pa haci un transferencia, pa motibo cu e señora no tin cuenta na banco. E departamento cu el a bay paga a dun’e e banco unda cu e tin cu haci transferencia. E personal na banco a keda bisa cu no por haci nada p’e, anto e departamento mes tin cu zorg con ta bay ricibi e placa.

E señora, sin sa kico pa haci, a bisa cu ta banco tin cu tuma e placa pa e departamento concerni por haya su placa bek. Esaki a keda nenga te cu e señora mester a bay cerca su casa na su trabou, pa asina por bay bek na banco.

Na otro banco, nan splica e pareha cu esey ta e regla nobo di banco. Pero esaki toch a yuda e señora pa haci e pago, mirando e situacion. “Antes bo por a haci pago na e banconan, y ta paga un fee extra pa haci e pago aki, pero awo ni asina nan kier tum’e. Pero ta e forma cu nan ta trata bo tambe; manera nan no por busca solucion pa mi, nan ta wak cu mi no tin trabou, ni cuenta, haci un excepcion, no ta paso mi no kier, ta paso mi no por.”

E señora ta bisa cu e ‘ta un inhusticia’ pa nan bin cu regla estricto, pa motibo cu no tur hende tin posibilidad di tin un cuenta, pa motibo di no tin trabou. Nan por haci, den algun caso urgente of necesario, un excepcion.

Bon Dia Aruba a yama Aruba Bank, kende a splica cu si un persona no tin cuenta cerca nan, nan no ta nenga. “E persona mester djis paga un fee extra si, pero e por haci su pago trankil cerca nos sin problema. Si nan no tin e cuenta di un scol of un departamento, pero ta haci e posibel.”

Tambe a check cu RBC bank. Nan a bisa cu en berdad e persona mester ta cliente di e banco pa por haci un pago. E no ta manera antes cu por a djis paga, pero e trahado a splica cu e ta bira mas facil pa motibo cu e persona por haci e pago via online.

“Si e tin cuenta na otro banco, e por transferi e placa via su cuenta online pa haci e pago na e banco online, y asina e placa ta yega na e cuenta di departamento; paso tin varios luga cu tin un cuenta na un banco so. E online tambe ta cobra un fee”, e trahado a splica.

E trahado di e banco tambe a splica cu si yega un persona cu no tin cuenta na ningun banco, of no tin trabou pa motibo cu e ta grandi di edad, nan ta busca un manera pa por asisti e y no lag’e keda manera no por haci nada p’e. A comunica cu CMB, y tambe tin e mesun regla cu persona cu mester haci un pago ‘mester tene un cuenta activo cu nos banco, pa por haci esaki’.

Sinembargo, e señora mayor di e edad a bisa cu mester tene cuenta cu esunnan grandi edad, tambe pa esunnan cu ainda no tin trabou vast, paso nan ta tin cu continua paga, y no tur ora tin acceso na online banking of cuenta di banco. “P’esey mi ta bisa por haci excepcion den algun caso”, e señora a finalisa bisa.