Dia 14 di juni ta Dia Mundial di Dunado di Sanger. Ayera Banco di Sanger di Aruba a conmemora e dia aki y tambe nan a haci un yamada na comunidad pa por bira un dunado di sanger boluntario, unda cu e acto aki por yuda pa salba bida di hende.

Fabian Werleman, coordinador di Banco di Sanger, a expresa cu ayera nan a ricibi diferente bishita como esun di prome minister Evelyn Wever-Croes. El a haci un rondleiding cerca nan unda Werleman a sigura cu nan a mustra nan preocupacionnan – esun di mas importante, cu nan tin mester di mas donante na Aruba.

El a informa cu nan tin un grupo di dunado di sanger di aproximadamente 1.500 cu ta duna sanger regularmente y pa un poblacion manera Aruba, nan mester tin aproximadamente 3.000 dunado di sanger. Werleman a splica cu si tin mas dunado di sanger lo por kita e presion di esnan cu ta duna sanger henter aña, unda cu tin algun di nan cu ta hacie hasta 3 biaha pa aña.

“Den tempo di Covid-19 hopi donante a haci nan best pa acerca na e banco y duna nan sanger, pero e solicitudnan pa bira boluntario a baha enorme”, manera el a expresa. E tempo ey hospital no tabata usa sanger, pero aworaki cu nan ta mirando cu e uso ta aumenta back y tur cos a bay den normalidad atrobe, “nos mester di mas boluntario, pasobra e 1.500 donante aki a yuda den tempo di Covid-19, pero aworaki mi ta kere cu ta bon pa pueblo cuminsa pensa, esnan cu kier bira donante pa aplica”.

Pa e motibo ey ayera nan a tuma un momento pa gradici tur esnan cu ta dunado di sanger y esnan cu a yega di hacie algun aña atras, cu tambe a contribui pero cu awor pa un of otro motibo, nan no por duna nan sanger mas.

Ademas, Werleman a menciona cu nan a haci algun campaña di conscientisacion, pero esey no tabata hopi grandi. “Como Stichting Bloedbank nos tin cu wak con nos ta bay haci nos trabao un tiki mas intensivo pa asina por yega mas cerca na e personanan cu ta desea di bira donante”, el a afirma.

Pa un persona por bira un dunado di sanger boluntario por subi e website www.bloedbankaruba.com y yena e formulario pa bira donante, unda cu despues e persona lo haya un cita pa cuminsa cu e procedura.

Donacion di sanger ta consisti di tres producto: plaketa, plasma y globulo cora cu ta sali di e mesun donante, esaki por yuda tres pashent.

E procedura medico ta consisti cu e sanger ta pasa pa un prome fase di centrifuga, eynan e sanger ta draai den un velocidad halto. Despues ta bay pa e di dos fase na un ekipo cu ta separa e globulonan for di e awa y di otro banda e plasma cu e plaketanan. Pa e di tres fase e sanger ta haya un likido special pa finalmente duna como resultado un sanger filtra, cu por usa pa un pashent.

Ta importante cu un persona por duna su sanger pa motibo cu semper ta existi un persona cerca di nos – cu por ta famia of algun hende conoci – cu por tin mester di sanger den algun momento di su bida. Sanger ta ireemplasabel y no tin prijs, simplemente ta haci un cos importante: Ta yuda pa salba bida.

Duna sanger tambe ta saludabel pa bida, p’esey hende muhenan en general ta mas saludabel cu hende homber den e sentido cu nan tin menos malesanan.

Pa un persona por bira dunado di sanger boluntario, mester ta saludabel y mester hiba un bida responsabel. Mester tin peso di mas cu 50 kilogram, mester tin un edad di 18 pa 65 aña. Pero un persona cu ta donante caba lo por duna sanger te 70 aña. Un hende muhe lo por duna sanger cada 4 luna y un hende homber cada dos luna y mey. E sanger cu e banco a duna mas ta e tipo O, pa motibo cu e mayoria di pashent ta O, despues ta bin tipo A, B y finalmente A-B.

Segun datonan di Organisacion Panamericano di Salud (PHO) na Latino America y Caribe a recolecta mas di 8.2 miyon di unidad di sanger na aña 2020, loke a mustra un disminucion di casi 20% compara cu aña 2017.

Di e 8.2 miyon donacion, 48% ta di origen boluntario, loke ta representa un aumento di 2% compara cu aña 2017.

Pa 2022 e campana di PHO ta cu e frase “Duna sanger ta un acto di solidaridad. Uni na esfuerso y yuda salba bida”. Cu esaki nan kier destaca e contribucion esencial di dunadonan di sanger pa yuda salba bida y fortalece e solidaridad den e comunidadnan.

Por medio di e campana di e aña aki, nan kier stimula e paisnan pa haci actividadnan specifico dirigi na e publicacion a traves di medionan di comunicacion y tambe a traves di relatonan di personanan cu nan bida a wordo salba danki na e donacion di sanger, como un forma di motiva e donantenan di sanger consecuente pa nan sigui duna sanger y esunnan cu ta den bon estado di salud cu nunca a duna sanger pa nan bira boluntario.