Ta parce cu gobierno, prome cu skirbi discurso pa laga Gobernador pronuncia, no ta ni coordina asunto cu Banco Central pa scucha nan opinion. Sino nan por a duna un panorama mas realistico di nos situacion economico. Un dia despues di e inauguracion di aña parlamentario, e institucion importante aki a publica su ultimo rapport (Economic Outlook) riba direccion di nos crecemento economico, cu ta conta otro storia.
Ta bira bisto cu no tin espacio pa e optimismo exagera cu gobierno a laga nos Prome Ciudadano pronuncia. Ta resulta cu e aña aki cos ta bayendo mas malo cu nos a supone te awor. Na april ainda Banco Central, a base di e cifranan di prome trimester di 2016, a proyecta un crecemento di 1.1% di GDP real. Awor e expectativa ta solamente 0.4%, basa riba un crecemento negativo di -1.3% nominal. E motibo cu e GDP real ta mustra miho ainda ta pasobra ta spera un deflacion na luga di inflacion, di 0.8%. E caida den nivel di prijs tin di haci tambe cu e falta di demanda di consumo, relaciona cu e pesimismo continuo di e consumidor.
Por cierto tabatin un mehoracion chikito den e pesimismo di consumidor, cu a haci cu e Indice di Confiansa di Consumidor, midi pa Banco Central, a subi un poco pero a keda bao di linea cora y lo keda asina tambe pa resto di aña, manera Banco ta opina. Si nos lesa bon loke Banco Central ta bisa, no tabatin un base real pa gobierno pone palabra pa Gobernador cu no ta cuadra cu berdad.
Tampoco nos por a tende den e discurso di Gobernador, of ta miho pa nos papia di e discurso di gobierno, cu turismo a cay considerablemente den prome mita di 2016. RevPAR a cay cu 5.8%, e ‘Average Daily Rate’ (ADR) a cay cu 5.3%, y e grado di ocupacion a bay atras cu 0.4%. Entrada procedente di turismo (Tourist Receipts) a cay cu 3.8%.
Banco Central ta yega tambe na e conclusion cu, pa loke ta keda ainda di e aña aki, e inversionnan den e refineria cu por tuma luga ainda, no por compensa mas pa e perdidanan ocasiona pa e retroceso den turismo y e cautela di e consumidor local. Basa riba tur esaki, nos lo mira pa fin di 2016 un economia den contraccion, cu ta bay di Afl. 4818 miyon (2015) pa Afl. 4755. Esaki ta bastante leu di e meta di 5000 miyon cu nos gobierno tabatin proyecta pa yega na 2015 caba. Na luga di esey, nos ta cayendo atras casi na nivel di GDP di 2014 (4725 miyon).
Naturalmente cu gobierno ta keda argumenta cu tur esey no ta importa, pasobra ora e refineria habri, “alles sal reg kom” manera sa bisa den Hulandes Sur Africano. Berdad, si e refineria keda converti den un ‘upgrader’ y cuminsa produci (na 2018), esey lo tin cierto spinoff economico. Pero ta improbabel cu esey lo bay tuma luga e aña aki ainda, ya cu ainda no tin nada conoci riba e aspecto di financiamento, cu por bay tuma su tempo. E problema ta cu banda di esey nos mester tene cuenta cu un deterioro den sector turistico, cu ta un asunto completamente separa y cu mester analisa a base di su mes parametro.
Den esaki tin varios asunto pa tuma na cuenta. Por ehemplo: ki efecto e ley riba all-inclusive recien aproba lo bay tin riba animo pa inversion den sector turistico, mirando e creciente competencia den nos region, algo cu Banco Central ta trece dilanti tambe. Kico lo ta e efecto di tur e plannan na caminda ainda pa aumenta e cantidad (no necesariamente calidad) di camber, di hotel of otro indole? Aumento di e competencia na Aruba mes entre hotelnan no necesariamente lo contribui na drecha e situacion.
Ta haci falta na e momento aki un analisis y un plan di maneho pa contra aresta e tendencianan actual den nos sector principal. Awor ta bin sali na cla cu nos por wel di conta cu un organismo di fomento di turismo cu tin mas cu suficiente recurso financiero pa haci propaganda pa nos pais, pero esey no necesariamente ta hiba nos na un crecemento sano den e mercadonan mas desea.
Por ultimo un señalamento di Banco Central cu por cierto a bin dilanti tantisimo biaha caba di parti di e gremionan empresarial: tin un incertidumbre encuanto e clima fiscal pa cu inversion cu ta afecta iniciativa di inversion priva seriamente. E iniciativanan pa inversion mayor ta bin solamente di banda di sector publico den forma di proyecto grandi, y no a crea un clima atractivo pa inversionista local y di exterior cu ta crea un base mas amplio di inversion diversifica. Tur e plannan di ministro encarga cu Financia a caba na nada y realmente no ta mira algo coherente cu por duna un boost na inversion.
Riba tur esaki ta bin e noticia cu gobierno su entradanan pa e aña aki por ta substancialmente menos cu a proyecta, aumentando e deficit y e debe total considerablemente. Vaya discurso!
editorial
