Ayera a traves di un comunicado di prensa, Banco Central di Aruba a informa cu a revoca e licencia otorga na FirstCaribbean International Bank pa opera den nos teritorio a traves di un branch como un institucion di credito. Esaki despues cu dos aña pasa, Aruba Bank a adkiri mayoria di operacion di FirstCaribbean International Bank.
“Conforme Articulo 11, paragraf 2 di Ordenansa Nacional riba Supervision di Sistema di Credito (AB 1998 no. 16) (Ltk), Banco Central di Aruba mediante esaki ta anuncia cu, riba solicitud di FirstCaribbean International Bank (Cayman) Limited (FCIB), riba dia 26 di october 2023, e licencia otorga na FCIB bao Articulo 24, paragraf 1 di e Ltk pa opera den e teritorio aki a traves di un branch como un institucion di credito, a keda revoca. E revocacion aki, di acuerdo cu Articulo 11, paragraf 2 di Ltk a bin na vigor dia 8 di december 2023,” segun e comunicado di Banco Central di Aruba ta informa.
Por recorda cu na october di 2021, Aruba Bank a informa di a adkiri mayoria di operacion di FCIB.
“Aruba Bank ta anuncia cu a drenta den acuerdo cu FirstCaribbean International Bank (Cayman) Limited (“FCIB Cayman”), un subsidiario di propiedad total di FirstCaribbean International Bank Limited (“First Caribbean”) pa cumpra cierto di su activo bancario na Aruba,” Aruba Bank a informa na 2021.
Anunciando e acuerdo aki, managing director di Aruba Bank, Peter Staal a describi e adkisicion di e negoshi di CIBC First Caribbean na Aruba como un excelente oportunidad pa e banco. El a nota: “Nos ta emociona pa e oportunidadnan cu e adicion aki den cliente lo provee y ta comprometi pa continua entrega servicio superior na nos clientenan nobo y existente.”
Igualmente, CEO di CIBC FirstCaribbean, Colette Delaney, a nota e tempo aya cu Aruba Bank ta un fit excelente pa e negoshi di e banco na Aruba, considerando su tamaño, amplitud di oferta di producto, base di cliente, y posicion fuerte den mercado.
Manera investing.com a publica luna pasa, CIBC FirstCaribbean International Bank Limited ta pasando den un strategia di transformacion. Esaki despues di intentonan pa alinea cu su compania mama, incluyendo un IPO listing den NYSE – cu no tabata exitoso – y un propuesta di benta como accionista mayoritario na e Colombiano, GNB financial Group.
November ultimo CIBC FCIB tambe a anuncia su plan pa bende e activonan bancario di su branchnan na Corsou y Sint Maarten, Orco Bank. Esaki lo completa e salida di e banco for di mercado di Caribe Hulandes.
Manera menciona, anteriormente CIBC FCIB a desinverti for di varios teritorio manera Aruba, St. Vincent and the Grenadines, y Republica Dominicana despues di un acuerdo fracasa di adkisicion cu Banco Nacional di Dominita Ltd.
