Banco Central di Aruba a produci un rapport solido y hopi completo pa loke ta e situacion actual den nos sector hotelero y e papel cu e hotelnan all-inclusive ta hunga actualmente. Pero Banco Central tin contrata profesional riba tereno financiero y economico, y no mirado di carta. Esunnan cu a spera cu lo haya den e rapport un contesta cla tocante con futuro di Aruba su turismo lo bay si no bin regulacion di acomodacion all-inclusive, lo a sali decepciona. Pero esey ta mas nan problema cu e ta algo pa cual por critica Banco Central.
Kico anto ta e puntonan cu ta resalta? Y den ki aspecto e rapport ta apoya e punto di bista di e ministro encarga cu turismo, o al contrario ta apoya opinion di oposicion? E rapport ta duna un bista riba e papel actual di e sector all-inclusive (AI), cu tin 1839 camber representando 35% di e total. E ta emplea 1700 persona, 32% di e total den sector hotelero. Pa loke ta e preocupacion cu e huesped AI ta keda cera den su resort y no ta gasta casi nada den resto di Aruba, esaki ta resulta di no ta berdad. Un 70% por lo menos di turista AI ta sali pafo y ta gasta como averahe 176 florin pa cada nochi/bishitante. Esaki ta menos cu e 224 florin cu e otro tipo di huesped (European Plan) ta gasta, pero en todo caso ta bon pa sa cu e situacion real no ta un ‘horror story’ tampoco. Tambe ta constata cu e hotelnan AI ta haci alrededor di 86% di nan compra pa F&B localmente via e empresanan di importacion. En general e rapport no ta mira un desaroyo, te awor, negativo pa loke ta e sector di AI. Esaki ta loke varios persona y instancia a comenta caba, cu ‘Aruba ta Aruba, no Jamaica o Republica Dominicana’.
Naturalmente Banco Central no por a keda sin toca e tema di e proyecto di ley cu ta pretende regula e impacto di all-inclusive riba nos turismo. Corectamente Banco Central ta señala cu Aruba no tin solamente un problema pa cu all-inclusive, pero cu ta trata na prome luga di un sector turistico madura, cu ta yegando na e maximo di su ‘carrying capacity’ y unda pa mas cu un decada caba tin problema di crecemento turistico sin control. E rapport ta señala cu den e combersacionnan cu e ‘partnernan’ tur sin excepcion a vocifera cu Aruba tin mas cu suficiente camber caba. Esaki ta completamente den linea cu e editorial aki a trece dilanti na varios ocasion, cu banda di e asunto di all-inclusive gobierno mester contesta e pregunta ta cuanto acomodacion turistico mas nan kier crea na Aruba. Ta contradictorio y inaceptabel cu e ministro en cuestion, y su coleganan, ta tira tur cos riba e asunto di all-inclusive, pero ta nenga redondamente di contesta e pregunta ta unda nan ta hibando Aruba cu tanto hotel y condominio cu kier construi ainda.
En todo caso Banco Central ta señala cierto necesidad di regula mercado pa mantene un balansa den e diferente tipo di acomodacion. Esaki no ta nada straño, pasobra practicamente tur instancia of organisacion envolvi ta mira e necesidad di regula e mercado. Sin embargo, den e rapport ta constata cu e ley cu ta den parlamento por hiba na un situacion di aumenta competencia no leal pa e hotelnan cu no ta AI caba, reduciendo nan capacidad di reacciona riba cambio di demanda den e mercado cu ta pidi mas AI, loke ta pone esunnan cu ta 100% AI caba den un bentaha inhusto. Banco Central ta mira mas den introduccion di un ley di regulacion di competencia den mercado (ley ‘anti-trust’), cual por cierto tin algun aña traha y tranca pa motibo desconoci. Esaki lo por yuda pone e control y actuacion den man neutral di un organismo regulador. Naturalmente e ministro concerni no kier tende nada di esaki, pasobra el a crea pa su mes caba e sistema di permiso, unda e ministro mes ta e ‘regulador’ cerca ken tur hotel mester acudi. Por conclui cu Banco Central ta apoya regulacion via ley mirando e riesgonan di crecemento no controla di AI, pero no ta encanta cu e ley presenta actualmente. Den e sentido aki ta dificil pa e ministro vocifera cu e rapport aki sin duda algun ta duna un sosten na su punto di bista.
Finalmente un palabra di aprecio pa e forma profesional cu e organismo importante aki a cumpli cu su tarea pa trece mas claridad – y un cantidad di informacion valioso – den e asunto polemico aki. Naturalmente e rapport no por a duna contesta kico exactamente lo bay pasa den e tereno aki, sigur no si e ley aki pasa y mester bay combati su efectonan negativo tambe. Loke ta di aprecia tambe ta cu Banco Central a responde positivamente riba e multiple peticionnan pa haya e rapport. Di e manera aki nan a duna nan aportacion tambe na practica transparencia poniendo e rapport disponibel riba nan website. “Zo hoort het”.
