A traves di un comunicado Banco Central di Aruba (BCA) ta adverti publico di dos website fraudulento. E websitenan ta https://arubafsc.org y e otro ta https://interbankaruba.com.

BCA ta splica cu e prome website fraudulento, administra pa e asina yama A.F.S.C Aruba Financial Services Commission, ta pretende di ta e unico instancia regulatorio pa companianan cu ta brinda servicio financiero na Aruba y ta uza e adres y telefon di BCA como nan informacion di contacto.

BCA ta indica cu ya caba dia 31 di mei 2023, e British Virgin Islands Financial Services Commission a emiti un aviso publico encuanto e website fraudulento aki, urgiendo publico pa ta hopi cauteloso. Tambe e International Organization of Securities Commissions (IOSCO) a emiti un alerta pa inversionista encuanto e website fraudulento aki dia 15 di juni 2023.

E di dos website fraudulento ta presenta su mes como un banco comercial y ta uza e nomber di un ex-banco comercial Arubano, esta: Interbank Aruba NV. BCA tin motibo pa kere cu e dos website aki ta conecta y/of wordo maneha pa e mesun (grupo di) persona(nan).

BCA a ricibi informacion cu AFSC a urgi personanan pa habri un cuenta riba e website di Interbank Aruba NV, sea ta pa inverti placa den of pa ricibi un compensacion di gasto. Algun persona a perde un cantidad significativo di placa.

BCA ta urgi publico pa no habri ningun link cu ta relaciona cu e dos website fraudulento aki y pa evita comparti cualkier informacion personal riba e websitenan aki.

BCA ta brinda tambe algun tips valioso pa tur persona por proteha nan mes contra estafa.

– No comparti ningun informacion personal cu un website ora bo no ta sigur si e ta un website legitimo di un autoridad publico cu bo ta tratando di haya acceso na dje;

– Si bo no ta sigur si un website ta legitimo, tuma contacto cu e autoridad publico concerni directamente pa verifica.

Si bo a bira victima di un estafa

Si bo a comparti bo informacion personal cu un website fraudulento, tuma e siguiente pasonan:

– Tuma contacto cu bo banco of compania di tarheta di credito mesora y informa nan cu bo por a bira victima di fraude.

– Cambia e “password” pa tur bo cuentanan online, incluyendo bo email, cuenta bancario y cuenta di tarheta di credito.

– Controla bo “statements” di banco y di bo tarheta di credito pa cualkier actividad sospechoso.

Si bo ta topa cu un website fraudulento, raporta esaki na e autoridadnan relevante, manera polis of Ministerio Publico. Door di raporta e estafa, bo ta yuda proteha otronan di bira victima di esaki!