Ayera Banco Central di Aruba a publica e status di nos economia den e prome trimester di 2017. “Indicadornan economico ta señala inicialmente un recuperacion di e economia cu e desaroyo alentador di e sector turistico como e motor principal”, asina e Banco ta informa.
Entrada turistico y hotelero a subi indicando cu e expansion di e mercado Mericano tabata suficiente pa cancela e efectonan negativo di e retraso di e mercado Venezolano.
Di acuerdo cu varios indicador, inversionnan di e sector priva a acelera. Importacion di metalnan basico, mashin y aparatonan electro tecnico a expande substancialmente. Al contrario, e cantidad di permiso pa construccion duna a cay (-11,8 porciento), aunke cu e balor total di e permiso a bira casi dobel (+97,9 porciento). Mientrastanto, fiansa pa construccion di cas a mustra un 0,7 porciento subida, pero hypotheeknan comercial a cay cu 1,3 porciento, asina Banco Central ta bisa.
Crecemento di consumo
Indicadornan di consumo ta sigui mustra un imagen diverso den e prome trimester di 2017, e instituto ta indica. Credito na consumidor a indica un caida di 2,3 porciento den e prome trimester compara cu december 2016. Datonan di entrada di belasting, di otro banda, ta señala un crecemento den consumo. Entrada di BBO y impuesto riba importacion a resulta den crecemento di 9,6 porciento y 2,9 porciento, respectivamente, parcialmente causa pa mas esfuerso den coleccion. Entrada di accijns a crece cu 48,9 porciento carga pa un subida significante riba accijns di tabaco (pa e pre compra di stampia) y tambe pagonan atrasa relata na accijns riba gasolin. Sin e efectonan incidental, ta calcula cu entrada di accijns lo mustra un crecemento substancial sinembargo.
Debe gobierno ta subi
Na fin di e prome trimester di 2017, e deficit di gobierno (incluyendo cambio den pagonan atrasa) tabata Afl. 93,4 miyon, financia principalmente pa un emision di bono di gobierno riba e mercado domestico. E debe total di gobierno a yega na Afl. 4.090,8 miyon, un subida di Afl. 65,5 miyon den e periodo bou repaso. Consecuentemente, e debe den porciento di e PDB ta surpasa e nivel di 85 porciento, yegando na 85,4 porciento.
Den e prome trimester di 2017, e balansa di pago a registra un surplus di Afl. 41,7 miyon compara cu un surplus di Afl. 103,1 miyon den e prome trimester di 2016. E surplus den e prome trimester di 2017 ta debi na un balans positivo den cuenta coriente cu a wordo rebaha parcialmente pa un deficit den e cuenta di capital y di finansa. Reservanan oficial a realisa un crecemento chikito den e prome trimester di 2017 (+Afl. 18,8 miyon). Consecuentemente, reservanan total (incluyendo diferencianan den revaluacion) a alcansa Afl. 1.952,7 miyon. E tasa di cobertura di importacion a yega 5,4 luna, cu ta 0,2 luna mas abou cu na e fin di e prome trimester di 2016, asina Banco Central ta conclui.
