Banco Central di Aruba (BCA) ta publica awe su Operational Report 2015. Den e rapport anual aki BCA ta relata riba diferente tereno di maneho manera esun monetario y di supervision, riba su obhetivo strategico, como tambe riba su actividadnan operacional principal relaciona cu su mandato manera stipula den e Ordenansa di Banco Central (AB 1991, no. GT 31). Adicionalmente, informacion financiero relaciona cu e operacionnan di BCA ta inclui. E rapport tambe ta duna un bista cortico riba e desaroyonan mas importante den e sector financiero di Aruba durante 2015.
E posicion financiero di BCA a permanece sano na 2015. Mester menciona sin embargo cu e entradanan relativamente abou for di e portofolio di inversion di BCA a keda un desafio den 2015, debi na e tasa di interes extremadamente abou den e mercado financiero Mericano. No obstante e situacion aki, e resultado netto di BCA a subi un poco te cu 3.3 florin miyon na 2015 (2014: 2.3 florin miyon), impulsa primordialmente pa e entradanan procedente di e introduccion di e Ordenansa Compensacion riba Margen di Cambio di Divisa (AB 2014, no. 57) desde dia 1 di april 2015. Di otro banda, e gastonan di BCA a crece moderadamente como resultado di e maneho estricto di gastonan cu CBA ta aplica.
Un logro importante pa BCA den 2015 tabata e desaroyo di su plan strategico “Bela Yen: Nos Plan Strategico 2016-2020” (Bela Yen). E cuadro den cual BCA ta opera ta birando mas y mas dinamico y compleho, cual ta rekeri un enfoke strategico pa maneha e diferente riesgo y retonan efectivamente, tanto interno y domestico, como tambe internacional.
En bista di e desaroyo economico modera, inflacion abou y nivel di divisa adecua, e Comision di Maneho Monetario (CMM) di BCA a dicidi di mantene e tasa di “reserve requirement”, cual ta e herment principal pa conduci maneho monetario, como tambe e tasa “advance rate”, na 11.0 porciento y 1.0 porciento, respectivamente, durante 5 reunion teni na 2015.
E sector financiero di Aruba a keda solido y sumamente resistente pa shocknan externo den 2015. Ehecucion estricto y consistente di e leynan y regulacionnan di supervision durante e transcurso di añanan a contribui na mantene un sistema financiero stabiel, di reputacion halto, y sano.
E Operational Report 2015 ta disponibel for di awe riba e website di BCA www.cbaruba.org.
