Banco Central di Aruba ta premira un crecemento economico di 2,7% na 2018 y 2017 lo cera cu un crecemento di 2,6% den termino real. Sinembargo nan ta preocupa pa e termino medio como cu ‘tin un incertidumbre considerabel’ riba e proyecto di refineria.
Ayera e Banco a publica nan Economic Outlook pa 2018 y e State of the Economy pa e prome dos trimesternan di 2017. Despues di dos aña di contraccion economico e economia ta aumenta na 2017 y 2018 pa motibo principal di ‘e exportacion di servicio turistico’. “Sinembargo, un condicion importante pa e crecemento ta e ehecucion (na tempo) di trabounan riba e refineria, pero tambe proyectonan di inversion grandi planea. Ehecucion di e proyecto di refineria ta wordo premira pa resulta den un nivel mas halto di e PDB pa e termino medio, pero cu un crecemento anual limita di produccion domestico. Sinembargo, tin un incertidumbre considerabel riba e proyecto aki”, Banco Central ta bisa den un relato.
E proyeccion di crecemento ta basa, entre otro, riba e recuperacion di nos economia den 2017. Cifranan di turismo a mehora cu crecemento den entrada turistico y expansionnan den e mercadonan Nort Americano y Latino Americano (no Venezolano). E actuacion turistico di Aruba ta ‘faborabel’ compara cu su competencia den e region Caribense (ora exclui e mercado Venezolano).
Inversionnan di e sector priva a acelera den e prome dos trimesternan di 2017, e Banco tambe ta informa. “E indice di percepcionnan di negoshi a crece remarcablemente den e di dos trimester di 2017, indicando cu tin un crecemento di confiansa den e economia di Aruba. Indicadornan di consumo ta sugeri cu e nivel di consumo a mehora cautelosamente den e di dos trimester di e aña.”
Gobierno: entrada y gasto a baha, debe ta subi
Entrada di gobierno a cay cu 0,8 porciento den e prome dos trimesternan di 2017 mientras cu gastonan di gobierno (incluyendo cambio den pagonan atrasa) a baha cu 1,1 porciento compara cu e mesun periodo di 2016. Debe di gobierno a yega na Afl. 4.188,6 miyon, un subida di Afl. 163,3 miyon den e mita aña bou revision, y asina hisa e debe den porciento di e PDB na un nivel sin precedente di 87,7 porciento.
Placa den circulacion a baha cu 0,8 porciento te Afl. 4.134,2 miyon na juni 2017 compara cu December 2016. Credito domestico a expande cu 0,3 porciento carga pa un aumento di 2,1 porciento den hipotecanan. E averahe di e tasa di interes riba prestamonan nobo a baha significante na 6,4 porciento, reflehando pa gran parti interesnan mas abou riba credito na empresa. Consecuentemente e margen di interes a cay na 5,0 porciento, e margen mas abou desde 1998.
E cuenta coriente di e balansa di pago a registra un surplus di Afl. 170,6 miyon den e prome dos trimesternan di 2017, relata na entradanan fuerte di turismo. E deficit den e cuenta di capital y di finansa di Afl. 151,3 miyon a wordo ocasiona pa entrada abou di inversionnan directo for di exterior pero tambe salida di fondonan for di e cuenta di inversion di portafolio.
Reservanan oficial a cay cu Afl. 11,8 miyon compara cu e fin di 2016. Consecuentemente, reservanan total (incluyendo diferencianan den reevaluacion) a alcansa Afl. 1.917,9 miyon. E tasa di cobertura di importacion a yega 5,5 luna, cu ta 0,2 luna mas abou cu na e fin di 2016.
