Banco Central Hulandes ta reporta prome perdida desde 1931 durante aumento di prijs di interes

(NLTimes)—De Nederlandsche Bank (DNB) a sufri di un perdida di casi 1 biyon euro aña pasa pa via di e aumento den prijs di interes. Esey ta e prome perdida den mas di 90 aña, segun e banco central Hulandes diahuebs ultimoden su rapport di aña.

Ta spera perdidanan grandi den e añanan binidero tambe. DNB no ta spera cu e por logra yega na un ganashi te 2028. Presidente di e banco, Klaak Knot, a taha caba tocante e scenario aki na september aña pasa. Pa via di e prijsnan halto di interes, e banco central mes a perde mas placa, mientras cu e redimentonan a cay den masa den bonnan cumpra e ultimo añanan.

E utimo biaha cu DNB a sufri di un perdida tabata na 1931, ora e banco central mester a tuma un golpi riba pond Britanico despues cu e Reino Uni a bandona nan standard di oro.

E resultadonan netto pa 2022 tabata cero, pero DNB por a logra esaki solamente door di saca 460 miyon euro for di e 11 biyon euro cu e institucion tin warda pa cubri e perdida. Esaki a resulta cu DNB no por paga beneficio pa e estado Hulandes.

Den e añanan binidero, e perdidanan por aumenta asina hopi cu e deposito di placa di e banco no ta bay ta suficiente mas, y e estado, como shareholder, mester wordo involvi. Manera e banco ta para awo, e por bay den cora cu mas di 3 biyon e aña aki, y tin chens cu perdidanan den biyones tambe lo sosode den e proximo añanan.

“E prijs di interes halto ta sigura cu DNB ta paga mas interes riba e balansnan cu banconan comercial tin cu DNB. Mientras cu e ganashi for di bonnan gubermental—cual a aumenta como resultado di e programanan di compra di ECB—no ta aumentando cu n’e, segun DNB den un declaracion.

E banco central ta wanta biyones di euro di seguridad di debe riba su papel di balans, cual a wordo cumpra pa un prijs mas halto despues di e crisis financiero y durante e pandemia di coronavirus. Pero e ganashi di e bonnan ta abou.

E problemanan aki ta similar cu esnan di e Silicon Valley Bank na Merca, cual recien a sufri di un collapse. “E diferencia ta cu nan no a acumula un provision desde 2015, segun Knot.

E hecho cu e prijsnan di interest ta aumentando rapidamente ta parcialmente pa via di e Banco Central Europeo (ECB), na unda Knot ta traha politica. Por medio di subi e prijsnan di interes, ECB ta purba di scapa e inflacion halto. Segun Knot, e resultadonan di ECB ta mas importante cu esun di DNB: “Nos no ta bay tuma nos mandato menos na serio pa via di nos mesun resultadonan.”

E presidente di DNB ta calcula cu si e perdidanan resulta manera nan a pronostica, e ora no mester placa for di e estado, pero el a bisa cu no tin ningun ciertumbre riba e asunto aki. Cualkier caso, e reputacion di DNB no lo ricibi daño, segun Knot. Ainda e banco central por maneha un temporada di ekidad financiero negativo facilmente. E ta reconoce si cu e situacion “no ta ideal.”