De Nederlansche Bank (DNB) ainda ta kere cu e situacion di inflacion na Hulanda ta “preocupante,” aunke prijsnan di consumo no a aumenta mesun hopi den ultimo lunanan, manera aña pasa. E miembro di e directiva di e banco, Olaf Sleijpen, a declara esaki diaranson durante un sesion di informacion den Tweede Kamer.
E hecho cu inflacion a baha recien ta pa via di un caida den prijsnan di energia, cual a experencia un aumento skerpi pa via di e guera entre Rusia y Urcania. Pero Sleijpen a subraya cu e nucleo di inflacion, cual ta exclui prijs di cuminda y energia, a keda halto.
Mientras cu e nucleo di inflacion keda halto, e Centro Banco Europeo (ECB) lo mester “tuma mas stap,” segun Sleijpen. Prijs di interes a subi cu un velocidad unico den e ultimo añanan pa asina curva inflacion. Como resultado, prijs di interes di mercado riba prestamo y spaar tambe a subi.
Sleijpen a cita e interes cu Hulanda ta paga riba bono di gobierno cu un termo di dies aña como un ehempel. Esaki tabata den negativo na fin di 2021, pero awo el a aumenta pa 2.9%. Esey ta “historicamente, no hopi halto,” pero e velocidad den cual e aumento a tuma luga si ta.
Prijs di interes aumentando a causa problema pa institucionnan financiero, particularmente na Merca. Esaki tambe a causa un inkietud den mercadonan financiero na Europa, specialmente ora mester a salba e Swiss bank Credit Suisse for di un collapse por medio di un cambio di maneho pa rival UBS.
“E bon noticia ta cu e stress cu nos a mira den e mercadonan financiero siguramente no a plama hopi den e sistema financiero,” Sleijpen a sigura. El a nota cu e mercadonan “ainda ta funcionando” y a mustra resilencia.
Segun DNB, e problemanan na Credit Suisse y e banconan Mericano tabata isola y no a sosode na Hulanda. Pero e aumento di interes ta un peligro pa institucionnan financiero Hulandes tambe. Nan por gana margen di interes mas halto, pero na e otro banda, riesgo di credito di cliente tambe ta aumentando.
